Úkimet Jezqazǵan qalasynyń bas josparyn maquldady, dep habarlaıdy "Adyrna" tilshisi.
Ulytaý oblysynyń ákimi Berik Ábdiǵalıuly QR Premer-Mınıstri Á.A.Smaıylovqa Jezqazǵan qalasynyń bas josparyn tanystyrdy. Nátıjesinde, Úkimet otyrysynda Ulytaý oblysy ortalyǵynyń basty qujaty maquldandy.
Jezqazǵan qalasy – Ulytaý oblysynyń ortalyǵy mártebesine ıe bolǵannan keıin, jańa obekt sanyn kóbeıtý qajettigi týyndaǵan soń bas josparǵa túzetýler engizý byltyr qolǵa alynǵan bolatyn.
Aıta keteıik, Jezqazǵannyń bas jospary osy ýaqytqa deıin úsh ret qoǵamdyq talqylaýdan ótip, turǵyndardyń pikirin eskere otyryp, memlekettik organdardyń maquldaýymen, qala qurylysy saraptamasynan ótken soń ázirlendi.
Anyqtama úshin: Bas josparda jańa jol qurylymy, turǵyn úıler, sport saraılary, teatr, stadıon, saýda, oıyn-saýyq ortalyqtary, áskerı qalashyq, órt sóndirý deposy, júzý basseıni jáne 29 balabaqsha, 8 mektep, 3 oblystyq, 4 qalalyq aýrýhana, balalardy ońaltý, onkologııalyq ortalyq qarastyrylǵan.
Qazirgi qoldanystaǵy basty qujat 117 myń turǵynǵa josparlanǵan bolsa, qabyldanýy qajet bas jospar 145 myń turǵynǵa shaqtalyp otyr.
Aldaǵy úsh aıda qala ákimdigimen birge bas jospar boıynsha jer bólinip, ınvestorlar óz jobalaryn júzege asyrý úshin bólingen jerler aýkıonǵa qoıylatyn bolady.
Jezqazǵan qalasynyń bas jospary – oblysty damytýdyń negizgi qujaty. Ol - qalada qurylys jumystaryn júrgizýge jáne qabiletti ınvestorlardyń jobalaryn júzege asyrýǵa, qalany qurý jáne odan ári damytýǵa múmkindik beredi.
