Qazaqstan Respublikasynyŋ Premer-Ministrı Älihan Smaiylov Qazaqstanda ötken jyly ıske asyrylǧan maŋyzdy jobalar turaly mälımdedı. Būl turaly ol «24KZ» telearnasyna bergen sūhbatynda aitty, dep habarlaidy “Adyrna” ūlttyq portaly.
«Bırınşı kezekte Qazaqstanǧa strategiialyq maŋyzdy aktiv – Qaraǧandy metallurgiia kombinatynyŋ qaitaryluyn atap körsetken jön. Ötken jyldyŋ jeltoqsan aiynan bastap bız osy kompaniianyŋ şeteldık menşık iesımen kürdelı kelıssözder jürgızdık jäne investisiialyq imidjge nūqsan keltırmei, el üşın tiımdı şarttar negızınde kelısımdı aiaqtadyq», — dedı Premer-Ministr.
Ükımet basşynyŋ aituynşa, endıgı kezekte Qarmet jaŋa investorynyŋ aldynda aldaǧy 3-4 jylda käsıporynǧa kemınde $3mlrd jeke investisiia salu mındetı tūr, onyŋ ışınde $1,3 mlrd qarajat keler jyly baǧyttaluy tiıs.
Premer-Ministr sondai-aq biyl «Astrahan-Maŋǧyşlaq» su qūbyryn jaŋǧyrtu aiaqtalǧanyn atap öttı. Joba Atyrau jäne Maŋǧystau oblystarynyŋ tūrǧyndaryn auyz sumen qamtamasyz etu mäselesın şeşuge kömektesedı.
Batys energiia torabynda jaŋa elektr jelılerı salyndy. Osylaişa, Qazaqstannyŋ bükıl batys aimaǧynyŋ tūtynuşylaryn energiia quatymen qamtamasyz etu edäuır artty. Būl – energetikalyq qauıpsızdık üşın de, el ekonomikasynyŋ damuy üşın de maŋyzdy.
«Eŋ kürdelı jobalardyŋ bırı – Ülken Almaty ainalma joly (ÜAAAJ) aiaqtaldy. Onyŋ aşyluy trafitı azaituǧa jäne megapolistegı ekologiialyq jaǧdaidy jaqsartuǧa, sondai-aq jük tasymaldau äleuetın keŋeituge mümkındık beredı», — dep atap öttı Älihan Smaiylov.
Sonymen qatar Astanada JEO-3 bırınşı kezegı, sondai-aq jaŋa «Oŋtüstık-Şyǧys» jäne «Tūran» gaz jylu stansiialarynyŋ qūrylysy aiaqtaldy. Būl nysandar Astanany tügeldei jylumen jabdyqtauǧa mümkındık beredı.
Batys Qazaqstan oblysynda «Rojkovskoe» ırı gaz kondensaty ken orny önerkäsıptık paidalanuǧa berıldı. Ol jylyna şamamen 1 mlrd tekşe metr gaz jäne 500 myŋ tonna kondensat közı bolady.
«Būdan basqa Qyzylorda jäne Aqtöbe oblystarynda taǧy ekı ken orny paidalanuǧa berıldı. Olar – “Oŋtüstık Aqsai” jäne “Şyǧys Örıktau” ken oryndary. Orta merzımdı perspektivada Aqtöbe, Atyrau jäne Maŋǧystau oblystarynda taǧy üş ken orny ıske qosylady dep kütılude», — dep atap öttı Premer-Ministr.
Sonymen qatar biyl ūzyndyǧy 300 km asatyn «Beineu-Jaŋaozen» magistraldyq gaz qūbyry ıske qosyldy. Sonyŋ nätijesınde Maŋǧystauda tūraqty gazben jabdyqtau mäselesı şeşıldı.
«Bız eldıŋ şyǧysy men oŋtüstıgınde ūzyndyǧy 1300 km asatyn tört strategiialyq maŋyzy bar temırjol jelılerı qūrylysyn bastadyq. Jalpy, men keibır maŋyzdy jobalardy ǧana atap öttım. Is jüzınde mūndai respublikalyq jäne öŋırlık maŋyzy bar jobalar öte köp. Bız olardy ıske asyru boiynşa jūmysty jalǧastyramyz», — dep qorytyndylady Älihan Smaiylov.
Ūqsas jaŋalyqtar
