Adyrna ūlttyq portalynda «Bärı de jaiaular üşın. 11 ötkeldı jaryqtandyruǧa 17 mln teŋge bölındı. Būl köp pe, az ba?» degen material jariialanǧan edı. Sol maqalaǧa "Aqtöbe qalasynyŋ tūrǧyn üi kommunaldyq şaruaşylyǧy, jolauşylar kölıgı jäne avtomobil joldary bölımı" jauap berdı, - dep habarlaidy Adyrna ūlttyq portaly.
Atalǧan materialda tılşımız 17 mln teŋge bölıngen tender qūjattaryndaǧy bırqatar kemşılıkterdı synaǧan bolatyn. Mäselen, tenderdıŋ tehnikalyq sipattamasynda kerektı qūral-jabdyq satyp alu turaly eşteŋe körsetılmegenı aityldy. Sondai-aq, tehnikalyq sipattamada "Qūrylysqa bailanysty emes, satyp alynatyn jūmystardyŋ tehnikalyq erekşelıgı" degen söilemnen jeŋımpaz kompaniia satyp alynyp qoiǧan daiyn materialdardy ornatyp şyǧu jūmysyna ǧana mındettelıp otyrǧanyn jazǧanbyz. Iаǧni, tapsyrys oryndauşy 17 mln 244 myŋ 591 teŋgege bar bolǧany 11 jaiau jürgınşıler ötkelıne elektr baǧanalaryn ornatyp, jaryq jalǧap beredı degen söz. Körsetılgen somany 11-ge bölsek, bır ǧana jaiau jürgınşıler jolyna elektr baǧandaryn ornatu jūmysyna 1 mln 567 myŋ 690 teŋge qarjy jūmsalady eken.
Portal tılşısı osyndai mäselelerdı aita kelıp: tiıstı mekemege ekı saual joldaǧan:
1. Jaiau jürgınşıler jolyn jasau, jaryqtandyru qala tūrǧyndarynyŋ qauıpsızdıgı üşın öte qajet. Bıraq, Aqtöbe qalasyndaǧy jaiau jürgınşılerdıŋ 11 ötkelınıŋ üstıne jaryqtandyruǧa arnalǧan baǧandardy ornatu üşın biudjetten 17 mln 244 myŋ 591 teŋge aqşa bölu köp emes pe?
2. Tehnikalyq sipattamada jūmysşylardyŋ alatyn jalaqysy ǧana körsetılgen. Sol jalaqy 251 myŋ 197 teŋge dep belgılenıptı. Iаǧni, 17 mln 244 myŋ 591 teŋgenı igerıp, 11 ötkeldı jaryqtandyru üşın kemı alpysqa juyq maman jūmysqa tartyluy kerek degen söz. Sonda aqtöbelıkter 11 dana jaiau jürgınşı jolyn jaryqtandyru üşın alpys maman tarta ma?
Būl sūraqtarǧa «Aqtöbe qalalyq tūrǧyn üi kommunaldyq şaruaşylyq, jolauşylar kölıgı jäne avtomobil joldary bölımı» MM-sı basşysy Bolat Serıkov bylai dep qysqa jauap qatypty.
«Hatyŋyzda körsetılgen 11 jaiau jürgınşı ötkelıne 22 dana jaryqtandyrudy smetalyq qūjattama arqyly jūmystar jürgızılıp, qondyrylǧandyǧyn habarlaidy. Jauappen kelıspegen jaǧdaida, 2020 jylǧy 29 mausymdaǧy №350-VI QR "Qazaqstan Respublikasynyŋ Äkımşılık räsımdık prosestık kodeksı" Kodeksınıŋ 91-babyna säikes, sız joǧary tūrǧan organǧa şaǧymdanuǧa qūqyǧyŋyz bar».
Baspasöz ökılınıŋ ekı sūraǧyna «Hatyŋyzda körsetılgen 11 jaiau jürgınşı ötkelıne 22 dana jaryqtandyrudy smetalyq qūjattama arqyly jūmystar jürgızılıp, qondyrylǧandyǧyn habarlaidy» degen bır söilemdık jauap beru Aqtöbe qalasy şeneunıkterınıŋ salǧyrttyǧy ma? Joq, älde «Biudjet aqşasyn qalai jūmsasaq ta özımız bılemız. Jauap ta bermeimız» degen emeurını me? Būl arasyn tüsıne almadyq. Tüsıngenımız Aqtöbelık memlekettık mekeme on sūraqqa da bır söilemmen jauap beruge qabılettı eken. Aqorda jiı aitatyn «Estitın ükımet» degen osy bolsa kerek. Estidı, bıraq jauap bergısı kelmeidı...
Qanat Bırlıkūly «Adyrna» ūlttyq portaly
