Batys Qazaqstan oblysynyń ákimdigi densaýlyq saqtaý basqarmasynyń sharýashylyq júrgizý quqyǵyndaǵy Oblystyq kóp beıindi aýrýhanasy «2024 jylǵa arnalǵan kartrıdjderdi toltyrý qyzmeti» degen ataýmen tender jarııalady, - dep habarlaıdy Adyrna ulttyq portaly satypalu.gov.kz saıtyna silteme jasap.
Tenderge qujattar tapsyrý 16 qańtarda bastalady. Jeńimpaz 31 qańtar kúni anyqtalady. Bir qyzyǵy, memlekettik satyp alý portalynda oblystyq bıýdjetten 4 mıllıon 200 myń teńge bólingen tender habarlamasy bir apta buryn jarııalanǵan. Buǵan deıingi jarııalanymdar tek «ótinimdi qabyldaý kúni» bastalǵanda kópshilik nazaryna usynylatyn.
Tenderge qatysýshylar negizinen jańa jarııalanǵan habarlamany izdeıdi. Demek, Batys Qazaqstan oblysyákimdigi densaýlyq saqtaý basqarmasyna qarasty aýrýhananyń bul tenderi 16 qańtar kúni bas betten kórinbeı, birneshe bet astyǵa túsip ketedi degen sóz. Bul 4 mıllıon 200 myń teńgelik habarlamany jasyrýdyń joly emes pe?
Tehnıkalyq sıpattama «Janarmaı quıýǵa ótinim berý jáne kartrıdjderdi toltyrý boıynsha basqa da máseleler oryndaýshynyń baılanys ortalyǵy (koll-ortalyǵy) arqyly júzege asyrylady» degen jańyltpash sóılemmen bastalǵan. «Janarmaı quıýǵa ótinim berý» degen ne? Aýrýhana prınterge benzın quımaq pa? Uzyn-sonar tehnıkalyq sıpattamadan túsingenimiz aýrýhana 4 mıllıon 200 myń teńgege 5 468 márte kartrıdj toltyrmaq eken. Ár kartrıdjdi toltyrý quny shamamen 769 teńgege baǵalanǵan. Bar bolǵany 30 túrli prınter markasy kórsetilgen. Olardyń ishinde bir jylda 778 márte kartrıdj toltyrý kerek «HP LaserJet Pro M102a» degen marka bar. Mundaı markaly qansha prınter bar ekeni jazylmaǵan.
5 468 márte kartrıdj toltyrýdy jyldyń 365 kúnine bólsek, tapsyrys oryndaýshy kúnige 15 prınterge qyzmet kórsetýi kerek.
Oblystyq kóp beıindi aýrýhanada qansha prınter bar? Bizdi osy suraq mazalaıdy? Bul suraqtyń jaýabyn tıisti mekeme naqty bermese, oblys bıýdjetinen bólingen 4 mıllıon 200 myń teńgeniń durys maqsatta jumsalyp jatqanyna kóz jetkize almaıtynymyz anyq. Sol sebepti kúmán týdyrǵan saýaldardy atalǵan mekemege joldadyq. Jaýap kelip jatsa, ony da jarııalaıtyn bolamyz.
Qanat Birlikuly
Adyrna ulttyq portaly
