Mūndai adam bolaşaqta älı talai soraqylyqty körsetedı degen edı. Rasynda solai boldy.
Älemge, öz elıne keleŋsız jaǧdailarmen tanylǧan Mädeniet ministrı Qazaqstan tarihynda ǧana bolǧan şyǧar. Esterıŋızde me, İlia İlin törtınşı märte älem bırınşılıgınıŋ altynyn qanjyǧasyna bökterıp, Änūranymyz oinalyp jatqanda Arystanbek Mūhamediūly Tolaǧai ūlymyzǧa ūialy telefondy tyqpalai bergenı. Sol kezde köpşılık BAQ betınde, äleumettık jelılerde Memlekettık rämızge qūrmetsızdık tanytqan öresı tar şeneunıktı jauapqa tartu kerek dep jarysa jazǧan. Bıraq, ol zaŋ şeŋberınde jazalanbady. Al ministrdıŋ özı mız baqpady. Mūndai adam bolaşaqta älı talai soraqylyqty körsetedı degen edı. Rasynda solai boldy.
Mädeniet ministrlıgı respublikalyq, halyqaralyq dep aidar taǧylǧan konsertter ötkızuden, dūrysy asabalyq qyzmetten ary aspady. "Ruhani jaŋǧyru", tarihi-mädeni, öner baǧytynda sübelı jūmystaryn köre almady. Kerısınşe, bıldei "mädeniettı" ministrdıŋ aty student qyzdarǧa yŋǧaisyz ūsynys jasaityndyǧy, "Qazaqfilmdegı» bır basqosuda özınıŋ dausyna ūqsas adamnyŋ aqşany qalai "jymqyru" kerektıgı turaly aitqany sekıldı jūrttyŋ jaǧasyn ūstatqan qaueset-daularmen şyǧyp jatty. Al 2018 jyldyŋ küzınde merdıger mekeme ökılınen para alǧan Mädeniet ministrlıgınıŋ lauazymdy şeneunıkterı jūmysynan şettetıldı. Anau-mynau emes, Arekeŋnıŋ bırge tıze qosyp jūmys ıstep jürgen senımdı adamdary - jauapty hatşy men departament direktory. Qaramaǧyndaǧy qyzmetkerler jemqorlyqpen aiyptalsa da ministr otstavkaǧa ketpedı.
Al biyl, iaǧni bügın onyŋ qyzmetınen bosatylǧanyna köbısı quanǧanymen, artynşa lezde olardyŋ köŋılı su sepkendei basyldy. Mūhamediūlynyŋ 2014 jyly ministrlıkke alyp kelıp, tärbielegen kadry Aqtoty Raiymqūlova MS ministrı atanyp şyǧa keldı. Onyŋ soŋǧy qyzmetı vise-ministr bolypty. Bır sözben aitqanda, bylyqqa batqan salanyŋ jūmysyna közı üirengen adamdy öz ornyna qaldyrdy. Halyq mūny körıp otyr. Qosylǧyştardyŋ ornyn auystyrǧanmen qosyndysy özgermeitının jaqsy bıledı.
Būǧan qosa... Qūrmettı Qasym-Jomart Kemelūly, Sız qyzmetke jastardy äkeletınıŋızdı aitqan edıŋız. Bıraq myna taǧaiyndaudan özgerıs baiqalmaidy. Öitkenı, Arystanbek Mūhamediūly 1963 jylǧy bolsa, Aqtoty Raiymqūlova 1964 jyly tuǧan. Prezident myrza, elımızdıŋ mädeniet salasyn basqaruǧa laiyq, jaŋaşyl, ısker jastar köp emes pe? Olardyŋ baǧyn nege bailaimyz? Ärıberıden soŋ mädeniet ministırlıgın muzykanttar ǧana basqarsyn degen qaǧida joq qoi. Mädeniet tek muzykadan tūrmaityny taǧy belgılı. Sondyqtan, ūltjandy, patriot, el aldynda jauapkerşılıktı sezınetın jastar osy salaǧa da auadai qajet.
Seiılhan Älnazarov
"Adyrna" ūlttyq portaly
