İlfa Iliiasqyzy 1935 jyly 29-mamyrda Almatyda düniege kelgen, bıraq 1937 jyly, nebary 2 jasynan bastap, "halyq jauy otbasynyŋ" müşesı retınde astanadan alastatylyp, bükıl Qazaqstan dalasyn aralap, köşıp ketuge mäjbür boldy. Soǧys jyldarynda Jambyl oblysynyŋ Merkı auylynda tūraqtady. Tek 1950-jyldardyŋ basynda ǧana Almatyǧa qaita oralǧan İlfa Jansügırova Şet tılderı institutyna oquǧa tüsedı. Ony bıtırgen soŋ Q.Sätbaev atyndaǧy politehnikalyq institutta, Abai atyndaǧy Qazaq pedagogikalyq instituynda nemıs tılı pänınıŋ oqytuşysy bolyp, QazSSR Pedagogikalyq qoǧamynyŋ Ǧalym hatşysy, sonymen qatar QazSSR Ǧylym akademiiasynyŋ şet tılder kafedrasynyŋ oqytuşysy bolyp jūmys ıstedı.
1958 jyly İlfa Iliiasqyzy Sanjar Orazūly Jandosovqa tūrmysqa şyǧady, ekeuı bes balany ösırdı. İlfa Jandosova tek batyr ana, joǧary bılıktı ūstaz ǧana emes, 34 jyl ǧūmyryn bırge ötkızgen ömırlık qosaǧy, 1992 jyly qaiǧyly qazaǧa ūşyraǧan memleket jäne qoǧam qairatkerı S.Jandosovtyŋ senımdı serıgı de bola bıldı. 1999 jyly ol Iliias Jansügırov qoǧamdyq qoryn qūryp, onyŋ jūmysyn özı basqardy. Qor Iliias pen Fatima Ǧabitovanyŋ şyǧarmaşylyq mūrasyn jinaqtap, zerdelep, audaryp, basyp şyǧardy, mektepter men muzeilerge qamqorlyq körsetıp otyrdy.
İ.Jandosova-Jansügırova "Taǧdyrymnyŋ ızderı" atty estelıkter jinaǧyn şyǧardy. Ömırınıŋ soŋǧy saǧattaryna deiın İlfa Iliiasqyzy Qazaqstandaǧy azamattyq qozǧalystar men olardyŋ belsendılerın qoldaumen öttı.
“Adyrna” ūlttyq portalynyŋ ūjymy marqūmnyŋ tuǧan tuystaryna qaiǧyra köŋıl aitady.
