Almaty qalasynyń Tótenshe jaǵdaılar departamenti qala turǵyndaryna aýa raıy týraly eskertý jasady, dep habarlaıdy «Adyrna» tilshisi.
Departament búgin, 16 aqpanda qalada jaýyn-shashyn, kóktaıǵaq bolyp, aýa temperatýrasynyń kúrt tómendeýi kútiletinin atap ótti.
«Aıaz fonynda elektr jelileriniń shamadan tys júktelýinen, elektr quraldaryn paıdalaný erejelerin buzýdan, gaz jabdyqtaryn, kómir peshterin durys paıdalanbaý jáne qoldan jasalǵan jylytý qurylǵylaryn paıdalaný saldarynan turmystyq órtterdiń shyǵý yqtımaldyǵy artady. Demalys kúnderi synap baǵanasy - 20 gradýsqa deıin tómendeıdi»,—delingen habarlamada.
Almaty qalasy TJ departamenti eskertedi:
- birneshe elektr qurylǵyny bir rozetkaǵa qosýǵa qatań tyıym salynady;
- toq kózderine qosylǵan elektr qurylǵylaryn uzaq ýaqyt qaraýsyz qaldyrýǵa bolmaıdy;
- elektr qurylǵysynyń qatty qyzýy nemese symdardyń zaqymdalǵan oqshaýlaýy anyqtalǵan jaǵdaıda, ony dereý toqtan ajyratyńyz.
