Qazaqstan Respublikasy Ükımetınıŋ nazaryna! Arys qalasyn qalpyna keltıruge bailanysty sol qalanyŋ tumasy retınde bırneşe ūsynystarymdy sızdermen bölıskım kelıp otyr. Özderıŋızge belgılı qaladaǧy tūrǧyn üiler men ǧimarattardyŋ 95 paiyzy qiraǧany turaly aqparat tarap jatyr. 90-şy jyldardaǧy toqyraudan keiın Arys qalasynyŋ tozyp ketkenı aitpasa da tüsınıktı. Qala degen qūr atauy bolmasa, qalaǧa sai körkı de, infraqūrylymy da joq. Qala ortalyǧy sanalatyn Ortalyq bazar aumaǧy eskı sürınsız ǧimarattar men eşqandai arhitekturalyq, qūrylys standarttaryna sai kelmeitın jabaiy qūrylystar qalanyŋ körkın qaşyryp tūratyn. QR Prezidentı Toqaev myrza Arys qalasyndaǧy zardap şekken tūrǧyndarymen kezdesu barysynda "qalany qalpyna keltıremız" dep qadap aitqanyna kuä boldyq. Endı qala ortalyǧynda eskırgen, myna jarylystardan qiraǧan, bülıngen ǧimarattardy tolyqtai būzyp tastap, ornyna şyn mänınde qalaǧa degen atqa laiyqty, qalaǧa körık beretın jäne Arystyŋ jaŋaruynyŋ, jaŋǧyruynyŋ simvoly bolatyndai zamanaui ǧimarattardyŋ salynyp, halyq igılıgıne berıluın qalaimyz. Arys qalasynyŋ ortalyǧyndaǧy eskı alaŋ jäne sol eskı alaŋnyŋ maŋyndaǧy ǧimarattar, T.Täjıbaev köşesındegı Ekınşı düniejüzılık soǧys kezınde salynǧan ekı qabatty eskı üilerdı süruge jıberıp, ornyna jaŋa zäulım zamanaui tūrǧyn üiler salynsa, qalaǧa körık beretın edı. Qazır oŋtüstık öŋırınde Türkıstan qalasyn damytu, körkeitu memlekettık deŋgeide qolǧa alynyp, qarqyndy jüzege asyrylyp jatqany belgılı, degenmen megopolis Şymkent pen oblys ortalyǧy Türkıstannyŋ janynda, arasynda tūryp, Arys qalasynyŋ tozyǧy jetıp, siqy qaşyp, qūldyrauy, eşqandai estetikaǧa sai kelmeitın jabaiy qūrylystar mekenıne ainaluy ädıletsız dep esepteimız. Sondyqtan Ükımetten myna tötenşe jaǧdaidan keiın "Arys qalasyn damytu jäne jaŋǧyrtu jönınde" Baǧdarlama ne joba qabyldap, onyŋ Ükımette, Parlamentte bekıtılıp, atqaruşy bilık tarapynan ıske asyryluyn sūraimyz.
Kenjeǧaraev Noiabr
"Adyrna" ūlttyq portaly
