Jańaarqa aýdanynyń ákimi "Adyrna" ulttyq portalynyń áleýmettik jelidegi paraqshasynda jarııalanǵan jazbaǵa jaýap berdi.
"Adyrna" portalynyń Instagram áleýmettik jelisindegi paraqshasynda Erlan Tóleýtaıdyń "Jańaarqada surapyl jut bolyp jatyr" degen jazbasy jarııalanǵan bolatyn. Sol jazbaǵa Ulytaý oblysy Jańaarqa aýdanynyń ákimi Qanat Qojyqaev jaýap berdi.
"Elde – Jańaarqada júrmin. Arqada, onyń ishinde Jańaarqa aýdanynda qulaq estip, kóz kórmegen (men týǵaly) jut bolyp jatyr, aǵaıyn. Keshe ózim ósip, erjetken Jańaarqa aýdany, Baıdaly bı aýylynda bolyp, óz kózimmen kórdim, jylqy jaryqtyq qyrylyp jatyr, qyrylmaǵany ábden aryp, týlaqqa aınalǵan.Túrtip qalsań – qulaǵaly tur. Qulaǵany turmaıdy – pyshaqqa ilinedi. Bıeler tegis qulyn tastaǵan. Tutas úıirler joǵalyp, iz-tússiz ketken. Mal baqqan, onyń súmesine qarap otyrǵan eldiń eńsesi túsińki. Jem-shóp jetpeıdi. Jylqy qolǵa qaraǵan soń – eldiń shóbi túgesilýge taıaý", - degen Erlan Tóleýtaıdyń jazbasy apatty jaǵdaıdan habar beretin edi.
Jelidegi sol jazbaǵa Ulytaý oblysy Jańaarqa aýdanynyń ákimi Qanat Qojyqaev bylaı jaýap berdi.
"Jańaarqa aýdanyndaǵy jylqy malyna baılanysty oryn alyp jatqan jaǵdaıǵa alańdatýshylyq tanytqan kóptegen azamat óz pikirlerin jazýda.
Eń aldymen, osyndaı jaǵdaıda tysqary qalmaı, elge janashyrlyq bildirgen jandarǵa rızashylyǵymyzdy bildiremiz. Qys sońynda oryn alǵan qıynshylyqtarmen tolyq tanyspyz. Bul baǵytta aýdandyq shtab qurylyp, tıisti mekemeler, kent, aýyldyq okrýg ákimderi men kásiporyndarmen, kásipkerlermen birlesken sharalar qolǵa alynýda.
Shyǵynǵa ushyraǵan mal sanyn anyqtaý, sharýa qojalyqtaryna jylqylardy tıisti oryndarǵa jetkizip alý úshin materıaldyq-tehnıkalyq kómek kórsetý, jem-shóp baǵasyn turaqty ustap turý jumystary júrgizilýde.
Qazirgi ýaqytta dalada tabylǵan jylqylardyń ıeleri anyqtalmaýda.
Ózińiz kóterip otyrǵan másele - Keńestik kezeńde osyndaı jaǵdaıda memleket tarapynan úlken kúsh salynǵany ras. Degenmen, ol ýaqytta mal tolyǵymen memlekettik menshikte, ıaǵnı, ortanyń maly bolyp tabyldy. Soǵan sáıkes, tıisti sharalar qabyldandy. Qazirgi jaǵdaı múldem bólek. Jylqy maly tolyq jeke menshik ıelerinde. Sondyqtan, olardy bazaǵa tirkeý, jem-shóp qoryn daıarlaý, olardyń baǵylýyn uıymdastyrý memlekettik organ quzyretine kirmeıdi. Jem-shóp shyǵynyn qaıtarý úshin memleket tarapynan beriletin sýbsıdııaǵa da árkim arnaıy júıege (bazaǵa) kirip, elektrondy qol qoıý arqyly, jergilikti ákimdiktiń qatysýynsyz suranys bere alady", - dep jazdy ákim.
Sonymen qatar, ákim shóptiń tonnasynyń baǵasy 120 myń degen derek negizsiz ekenin aıtty.
"Qyzylorda men Shymkent jaqtan jońyshqa jetkizilip, satylýda. Aýdan ishinde shóp qory bar, sharýashylyqtar tonnasyn 35-60 myń aralyǵynda satýda. Kebek qory jetkilikti. Olar ár pýnktte qaby 1350 -1450 teńgeden satylýda. Aýdan ákimdigi jem-shóp baǵasyn kótermeý úshin kásipkerlermen kelisimge kelý jumystaryn júrgizip jatyr.
Jalpy, Jańaarqa aýdanynda agroónerkásiptik kesheninde 12- JShS, 987 sharýa qojalyqtary jumys jasaıdy.
2023 jyly oblys ákimdiginiń qaýlysymen bekitken erejesine saıkes, talapqa saı keletin sharýa qojalyqtaryna oblystyq bıýdjet esebinen aýdanymyzdyń 584 sharýa qojalyǵyna jem-shóp shyǵynyn óteý úshin barlyǵy 749 mln. 294 myń teńge kóleminde sýbsıdııa berildi.
Jańaarqa aýdanynda qarasty sharýa qojalyqtaryna sýbsıdııa úlestirýdi Ulytaý oblysynyń aýyl sharýashylyq basqarmasy júzege asyrady. Ol úshin EGov elektrondy úkimet portaly arqyly ótinim berýge bolady", - dep kommentarıı jazdy ákim Qanat Qojyqaev.
