Adam ömırı üşın jandaryn qauıpke tıgıp, tılsız jaumen alysqan naǧyz batyrlar - ört söndıruşıler. Ölım men ömırdıŋ arasynda jantalasyp, qyzmetı men mındetın abyroily atqaratyndar da osy jandar. Eren erlıktıŋ ülgısın tanytyp, ünemı qūral-saimandaryn saqadai sai daiyndap, kez kelgen uaqytqa daiyn boluǧa beiım. Sebebı, qyzyl jalyn mült ketudı keşırmeidı.
Osyndai jauapkerşılıgı mol jūmysty atqaryp jürgen ört söndıruşınıŋ bırı - Aqtöbe oblysy Temır audany Şūbarqūdyq kentınıŋ № 16 Ört söndıru bölım bastyǧynyŋ orynbasary, azamattyq qorǧau kapitany Jantöre Aqnūrmen tıldesken edık.
Ört söndıru mekemesınde 6 jyl abyroily eŋbek etıp keledı.
Aqnūr qyzmet etetın bölım tek ört söndıru jūmystarymen ǧana emes, avariialyq-qūtqaru qyzmetımen de ainalysady. Audan boiynşa şaqyrtu köp tüsetın mekeme de osy jer.
Foto: keiıpkerdıŋ jeke mūraǧatynan
«ÖRTTE ÄR SEKUND BAǦALY»
«Bız örttı söndırıp qana otyrmaimyz. Audanda türlı tötenşe jaǧdailar bolady. Tört mezgıldıŋ är türlı qauıpıne tap bolǧan adamdarǧa kömek qolymyzdy sozamyz. Qysta boranǧa qalyp, adasyp ketetınder bar, keide malyn ızdep şyǧatyndar tūmanǧa qalyp qoiady. Köktemde su tasidy, jazda ystyqtan ört köp bolsa, küzde jinalǧan, qūrǧaǧan şöpterdıŋ örtenuı köp bolady. Osyndai türlı tötenşe jaǧdailar jiı oryn alady.
Tötenşe jaǧdailar kezınde türlı oqiǧa bolady. Adamdy qūtqaryp aman alyp qalsaq, quanyp, özımızge riza bolamyz. Al ökınışke qarai, ülgere almai qalyp, adam ömırı qiylsa, janymyz auyrady. “Ört söndıruşıler lezde kelmedı” dep aiyptap jatady. Bıraq olar bırden habarlaspai, bırı videoǧa tüsırıp jatady, bırı özım söndırem dep, 10-15 minuttan keiın habarlasyp jatady, bırı abdyrap keş qalady. Örtte är sekund baǧaly. 15-20 minut jaŋǧan ört boi bermeidı. Bız barǧannyŋ özınde aimaqta ne bar ekenın, gaz, balon nemese adam bar ekenın anyqtap, barlauymyz qajet. Aldymen, adamdy qūtqaryp, keiın qauıptı zattardyŋ jarylmauyn qadaǧalaimyz», - deidı Jantöre Aqnūr.
Aqnūr qyzmet etetın bölımnıŋ tehnikalyq jabdyqtary men ört söndıru avtomobilderı tügeldei jaŋa. Mamandar üşın de jaǧdai jasalǧan.
«Audan boiynşa, ört söndıru qyzmetınıŋ tehnikasy öte jaqsy. 80-90% tehnika jaŋa. Bızdıŋ bölımde 2 avtosisterna bar. Ekeuı de jaŋa. 23 adam jūmys ısteidı. Kezekşılıkte 5 adamnan kem bolmaidy. Bärı jūmysyna adal. Keide jūmysqa jaŋadan jastar kelıp jatady. Keibırı 1-2 ai ıstep, jūmystyŋ qiyndyǧyna üirene almai, jalaqyǧa da qarap, şyǧyp ketedı. Nietı basynda aqşa bolǧandar, adamǧa kömektese almaidy. Bızdıŋ jūmys adaldyqty talap etedı», - deidı maman.
«QAI KEZEKŞILIK SOŊǦYSY BOLATYNYN BILMEIMIZ»
Ört söndıruşıler ünemı fizikalyq jäne psihologiialyq daiyndyqtan ötıp tūrady. Kündelıktı arnaiy kiımderın saqadai sai daiyndap, temırdei tärtıpke beiımdelgen. Kündelkıtı kezekşılıgın bır-bırıne abyroimen tapsyryp, jauapkerşılıkpen qabyldap alady.
«Qyzmetkerler qiyn oqiǧadan keiın özderıne qabyldap, ūmyta almai jüretın kezderı bolady. Bız barǧanşa adam qaitys bolsa, “nenı dūrys ıstemedık, erterek barǧanda ülgeretın edık qoi” dep qapalanady.
Öz ömırıŋnen özgenıŋ ömırı maŋyzdy bolady. Aldyŋda ne bolatynyn bılmeisıŋ, ärdaiym oqys oqiǧaǧa daiyn bolasyŋ. Qai kezekşılık soŋǧysy ekenın bılmeimız. Bırınde aşyq tūrǧan toq jauyŋ, bırınde biıktık, bırınde ört, bırınde su. Bastysy adam janynyŋ amandyǧy», - dep sözın qorytyndylady Jantöre Aqnūr.
Dana Nūrmūhanbet
“Adyrna” ūlttyq portaly
