Aqtóbede egde jastaǵy qarııa ýnıversıtet qabyrǵasynda bilim alyp júr, dep habarlaıdy "Adyrna" tilshisi Eýrazııa birinshi arnasyna siltep.
83 jastaǵy zeınetker - Zaýza Moldabaeva.
Ol 40 jyl ǵumyryn medıına salasynda ótkizgen. Zeınetker Temir aýdanynda terapevt dáriger bolyp eńbek etip, keıin basshylyq qyzmetti de atqarǵan.
Búginde nemere súıip, "aqshashty áje" atanǵan zeınetker “Kúmis” ýnıversıtet jobasy boıynsha bilim alýda. Izdenisti jany súıetin áıel baǵdarlama týraly ǵalamtordan oqyp, bilgen eken.
“Munyń ishinde aǵylshyn tilin de úıretedi eken. Áıelderdi tigýge beıimdeıtin bólek bólim bar. Sodan keıin qazirgi IT kompıýterlik jumystardy da úıretedi. Shetelderde aqparat júıesi óte damyp ketti. Endi biz sodan qalmaýymyz kerek. Soǵan ilesýimiz kerek”, – dedi Zaýza Moldabaeva.
80-nen asqan áıel qazaq tilimen shektelmeı, aǵylshyndy da úırený kerek dep sanaıdy.
“Sheteldikterdiń berip jatqan aqparattyń mańyzy qandaı, onyń bizge paıdasy bar ma? Sony túsiný úshin aǵylshyn tilin oqýǵa kirisip jatyrmyn. Mysaly to be degen qazaqsha “bolý” degen sóz. Meniń bolýym kerek. Men degen sóz I'm.”, – dedi ol.
Qoǵamǵa aralasyp, belsendi ómir súrýdi tańdaıtyn keıýana qaladaǵy eriktiniń biri.
"Zeınetke shyqsam da, qoǵamdyq jumystarǵa aralasýdy toqtatpadym. Qalamyzdaǵy volonterlyq uıymnyń múshesimin. Qalany abattandyrý, kóshet otyrǵyzý, tazalyqty saqtaý jumystaryna atsalysamyn. Máshhúr Júsip Kópeıuly «Men aıtpasam bilgenimdi. Sen jazbasań kórgenińdi, Urpaǵyń qaıdan biler ómir súrgenińdi» degen eken. Osy qaǵıda – meniń ómirlik ustanymym", - deıdi Zaýza ájeı.
