Ázerbaıjanda qazaqtyń dáýlesker kúıshisi Qurmanǵazy atyndaǵy Balalar shyǵarmashylyǵy ortalyǵynyń saltanatty ashylý rásimi ótti, dep habarlaıdy "Adyrna" tilshisi.
Ortalyqtyń ashylýyna Qazaqstan Prezıdenti Qasym-Jomart Toqaev pen Ázerbaıjan Prezıdenti Ilham Álıev qatysty.
Prezıdent zamanaýı ınnovaııalyq ortalyqtyń "Qazaqstannan syılyq" ekenin aıtty.
"Bul – Qazaqstan halqynyń tartýy. Meniń jeke tapsyrmam boıynsha atalǵan syılyqty jekemenshik BI Group kompanııasy búkil halyqtyń atynan shyn júrekten usynyp otyr. Ortalyq elderimiz arasyndaǵy jan-jaqty baılanystardy nyǵaıtýǵa qyzmet etedi dep oılaımyn. Sizderge tabys pen baq-bereke tileımin. Ázerbaıjannyń osy qasıetti ólkesi qaryshtap damı beretinine senimdimin", – dedi Qazaqstan Prezıdenti Fızýlı jurtshylyǵymen áńgimelesý kezinde.
Prezıdent Ilham Álıev Qasym-Jomart Toqaevqa jáne barsha Qazaqstan halqyna da alǵysyn aıtty.
"Baýyr retinde osyndaı keremet syı jasaǵanyńyz úshin Sizge alǵys aıtqym keledi. Azat etilgen jerlerde Balalar shyǵarmashylyǵy ortalyǵyn salý Sizdiń bastamańyz edi. Osydan bir jarym jyl buryn Ázerbaıjanǵa kelgen kezińizde, atalǵan ortalyqtyń jobasy tanystyrylǵan bolatyn. Ol bir jyl ishinde salyndy jáne búgin resmı túrde ashylyp otyr. Ortalyq qazaq halqynyń uly perzenti Qurmanǵazynyń esimimen ataldy. Keshe aıtqanymyzdaı, bul tek balalardyń shyǵarmashylyǵyn shyńdap qana qoımaı, Qazaqstan men Ázerbaıjannyń dostyǵy men baýyrlastyǵyn aıshyqtaıtyn ortalyq bolady. Biz bul tartýǵa shyn júrekten rızashylyǵymyzdy bildiremiz. Ázerbaıjan halqy muny eshqashan umytpaıdy", – dedi Ilham Álıev.
Prezıdent sheteldegi ortalyqqa dáýlesker kúıshi Qurmanǵazynyń esimi kezdeısoq berilip otyrǵan joq ekenin de aıtty.
"Shyn máninde, Qurmanǵazy – qazaq mýzykasynyń alyby. Tipti túrki mádenıetiniń ajyramas bóligi dep aıtýǵa bolady. Qazaqtyń kúı ónerin Qurmanǵazysyz elestetý múmkin emes. Onyń týyndylary óte tegeýrindi ári zamanmen birge jasaı beredi. Sondyqtan onyń áıgili «Saryarqa» kúıin halyq áli kúnge deıin tebirene tyńdaıdy", – dedi Qasym-Jomart Toqaev.
Nysandy jobalaý jumystary úsh aıdyń ishinde jasalyp, qurylysy 9 aıda aıaqtaldy. Odan bólek memleket basshysy Qasym-Jomart Toqaev Ortalyq ujymyna Qurmanǵazy dombyrasynyń kóshirmesin, bilim oshaǵynyń tárbıelenýshilerin tasıtyn avtobýsty syıǵa tartty.
