Äzerbaijanda qazaqtyŋ däulesker küişısı Qūrmanǧazy atyndaǧy Balalar şyǧarmaşylyǧy ortalyǧynyŋ saltanatty aşylu räsımı öttı, dep habarlaidy "Adyrna" tılşısı.
Ortalyqtyŋ aşyluyna Qazaqstan Prezidentı Qasym-Jomart Toqaev pen Äzerbaijan Prezidentı İlham Äliev qatysty.
Prezident zamanaui innovasiialyq ortalyqtyŋ "Qazaqstannan syilyq" ekenın aitty.
"Būl – Qazaqstan halqynyŋ tartuy. Menıŋ jeke tapsyrmam boiynşa atalǧan syilyqty jekemenşık BI Group kompaniiasy bükıl halyqtyŋ atynan şyn jürekten ūsynyp otyr. Ortalyq elderımız arasyndaǧy jan-jaqty bailanystardy nyǧaituǧa qyzmet etedı dep oilaimyn. Sızderge tabys pen baq-bereke tıleimın. Äzerbaijannyŋ osy qasiettı ölkesı qaryştap dami beretınıne senımdımın", – dedı Qazaqstan Prezidentı Fizuli jūrtşylyǧymen äŋgımelesu kezınde.Prezident İlham Äliev Qasym-Jomart Toqaevqa jäne barşa Qazaqstan halqyna da alǧysyn aitty.
"Bauyr retınde osyndai keremet syi jasaǧanyŋyz üşın Sızge alǧys aitqym keledı. Azat etılgen jerlerde Balalar şyǧarmaşylyǧy ortalyǧyn salu Sızdıŋ bastamaŋyz edı. Osydan bır jarym jyl būryn Äzerbaijanǧa kelgen kezıŋızde, atalǧan ortalyqtyŋ jobasy tanystyrylǧan bolatyn. Ol bır jyl ışınde salyndy jäne bügın resmi türde aşylyp otyr. Ortalyq qazaq halqynyŋ ūly perzentı Qūrmanǧazynyŋ esımımen ataldy. Keşe aitqanymyzdai, būl tek balalardyŋ şyǧarmaşylyǧyn şyŋdap qana qoimai, Qazaqstan men Äzerbaijannyŋ dostyǧy men bauyrlastyǧyn aişyqtaityn ortalyq bolady. Bız būl tartuǧa şyn jürekten rizaşylyǧymyzdy bıldıremız. Äzerbaijan halqy mūny eşqaşan ūmytpaidy", – dedı İlham Äliev.Prezident şeteldegı ortalyqqa däulesker küişı Qūrmanǧazynyŋ esımı kezdeisoq berılıp otyrǧan joq ekenın de aitty.
"Şyn mänınde, Qūrmanǧazy – qazaq muzykasynyŋ alyby. Tıptı türkı mädenietınıŋ ajyramas bölıgı dep aituǧa bolady. Qazaqtyŋ küi önerın Qūrmanǧazysyz elestetu mümkın emes. Onyŋ tuyndylary öte tegeurındı ärı zamanmen bırge jasai beredı. Sondyqtan onyŋ äigılı «Saryarqa» küiın halyq älı künge deiın tebırene tyŋdaidy", – dedı Qasym-Jomart Toqaev.Nysandy jobalau jūmystary üş aidyŋ ışınde jasalyp, qūrylysy 9 aida aiaqtaldy. Odan bölek memleket basşysy Qasym-Jomart Toqaev Ortalyq ūjymyna Qūrmanǧazy dombyrasynyŋ köşırmesın, bılım oşaǧynyŋ tärbielenuşılerın tasityn avtobusty syiǧa tartty.
Ūqsas jaŋalyqtar
