Almaty äkımı Baqytjan Saǧyntaev Almaty-1 temırjol vokzalynda jūmys saparymen boldy.
Eŋ aldymen äkım vokzal janyndaǧy kürdelı jöndeuden ötken territoriiany baǧalap şyqty. Qala basşysy qai baǧytta joluşylar aǧyny köptıgın sūrady.
«Oŋtüstıkten keledı. Almaty-2 qalanyŋ ortalyqtaryn qamtysa, oŋtüstık audandardan Almaty-1 vokzalyna toqtaidy. Türksıb audanyndaǧy 39 avtobus marşrutynyŋ barlyǧy Almaty-1 vokzalyna kelıp toqtaidy», - dedı qala äkımınıŋ orynbasary Erlan Äukenov.
«Tünde qalai mūnda? Audandaǧy basqa jerler de sondai ma? Älde kelgen adamdarǧa körsetıletın jer ǧana ma?» - dedı äkım.
«Bolaşaqta vokzal maŋyn şamamen 1 km radiusta körıktendıru josparda bar», - dedı Erlan Äukenov. Qala äkımı vokzal maŋynda trotuardyŋ joqtyǧyna nazar audardy.
«Trotuar jasaŋyzdar. Myna soqpaqtarmen jüru mümkın emes. Trotuar jasau, problema emes qoi. Ary ketse 15-20 metr ǧoi, esesıne adamdardyŋ alǧysyn alasyzdar», - dedı qala äkımı.
Osy sätte Baqytjan Saǧyntaevqa ekı tūrǧyn kelıp, audandaǧy keptelıs, päterlerdı jalǧa beru biznesınıŋ örşıp tūrǧanyn aityp şaǧymdandy.
«Men audan äkımıne jezökşelıkpen aqşa tabu, esırtkı nüktelerı jaqsy damyp ketkenın aittym. Būl derekter äleumettık jelıde aityldy. Ökınışke orai äkım köp män bermedı. Tūrǧyndarǧa avtobustar, jynoinaq ordalary kedergı keltıredı. Mas, tūrǧylyqty jerı joq adamdar köp. Äkım bomjdardyŋ köptıgı tūrǧylyqty mekenı joq adamdardy beiımdeu ortalyǧynyŋ barlyǧymen bailanystyrdy. Qazır kele jatsaq, aldymyzdan tältırektep bır mas kele jatyr. Būnyŋ bärın şeşetın bolamyz», - dedı B.Saǧyntaev. Qalalyq Polisiia departamentı basşysynyŋ orynbasary köp jyldan berı osy mäselelerdıŋ özektı bolyp kele jatqanyn aitty. Onyŋ aituynşa, polisiia şeşımın tabu üşın jūmys ıstep keledı.
«Köp jyldan berı me? Sız köpten berı ısteisız be? Onda sızder tük şeşpeisızder. Osyǧan üirenıp ketkensızder», - dedı äkım.
Mūnyŋ aldynda Almaty-1, Almaty-2 vokzaldary qalanyŋ kommunaldyq menşıgıne berıletını aitylǧan bolatyn.
Derekköz: inform.kz
"Adyrna" ūlttyq portaly
