Ony álemdegi eń kedeı prezıdent dep te ataıdy.
Bir eldi aýzyna qaratyp, el basqarǵan prezıdentterdi ádette úlde men búldege orynǵan, qalaǵany oryndalatyn adam retinde elestetemiz. Alaıda qarapaıymdylyqty serik etip, "halyqtan úlken emespiz" dep, kishipeıildik tanytqan prezıdentter de bar.
3-oryn: Djımmı Karter, (1977-1981) jyldar aralyǵynda AQSh-tyń prezıdenti bolǵan.
Djımmı Karter AQSh-ty 4 jyl ǵana basqarǵan. Qazir ol – 94 jasta. Ol óziniń áıelimen birge kishkentaı úıde turyp jatyr. Ol prezıdenttik merzimi aıaqtalǵannan keıin bıznespen aınalysqan. Alaıda bári sátsiz aıaqtaldy. Sondaı-aq ol 210 myń dollar prezıdenttik zeınetaqy alady. Qazirgi tańda ol úı sharýashylyǵyn qadaǵalap, salaýatty ómir saltyn ustanady.
2-oryn: Mahmýd Ahmadınejad (2005-2013) jyldary Irannyń prezıdenti bolǵan.
Ol álemdik arenada AQSh-qa túrli sankııalar arqyly qarsylyq bildirip otyrǵan. Mahmýd Ahmedınejad prezıdent bolǵan kezde onyń menshiginde ákesinen muraǵa qalǵan Irandaǵy eń kedeı aýdanda ornalasqan lashyǵy men eski kóligi bolǵan.
Sonymen qatar, ol qymbat dúnıelerge qyzyqpaǵan. Tipti prezıdent bolǵan kezdiń ózinde kabınetindegi qymbat kilemderdi arzan kilemderge aýystyrǵan. Al persııalyq qymbat kilemderdi meshitterdiń birine beripti. Jumysqa jurt qatarly avtobýspen baryp, túski asqa áıeli irimshik qosyp jasaǵan býterbrodty jegen. Eń qyzyǵy, prezıdenttik zeınetaqydan bas tartyp, ýnıversıtetterdegi jumysy arqyly kúnin kórip júr.
1-oryn: Hose Alberto Mýhıka Kordano, (2010-2015) jyldary Ýrýgvaıdyń prezıdenti bolǵan.
Ony álemdegi eń kedeı prezıdent dep te ataıdy. Qazir ol – 83 jasta. Óziniń aı saıyn beriletin 12 500 dollar prezıdenttik zeınetaqysynyń 90 paıyzyn qaıyrymdylyqqa jumsaıdy. Ózi 1250 dollarǵa kún kórip júr. Ýrýgvaıdyń eks-prezıdenti áıelimen birge sharýa qojalyǵynda turady. Sýdy qudyqtan tasıdy. Sondaı-aq, eń qymbatqa alǵan dúnıesi 2000 dollarlyq – 1987 jylǵy kólik. Tipti resmı túrde saqtandyrylmaǵan.
Túıin: Olardyń záýlim saraıda turyp, aýqatty ómir súrýge múmkindigi bolǵan joq emes, boldy. Alaıda olar baılyqtan bas tartty. Prezıdenttik merzimde qaltasynyń qamyn emes, halyqtyń ál-aýqatyn, jaǵdaıyn oılady. Jaı ǵana halyqtyń aldynda óz mindetterin adal atqarýǵa tyrysty. Tarıhta eń zalym, eń qomaǵaı han retinde de nemese eń qarapaıym, eń adal patsha retinde de qalýǵa bolady.
"Adyrna" ulttyq portaly
