Aqmola – Astana – Nūr-Sūltan
Osydan tura 25 jyl būryn elordany Almatydan būrynǧy Aqmola qalasyna köşıru turaly bastama köterılgen bolatyn. 1994 jyly sol kezdegı memleket basşysy Nūrsūltan Nazarbaev Parlament otyrysynda osy ideiany jariialady. Alaida deputattar ūsynysty bırden qabyldamady. Degenmen, üş jyldan keiın elordany auystyru turaly jarlyqqa qol qoiyldy. Ol kezde qalanyŋ atauyn özgertu jaiynda äŋgıme bolǧan joq. Araǧa bır jyl salyp, 1998 jyly Aqmola qalasynyŋ atauy Astana bolyp özgertıldı. Sol jyly 10 mausymda Astananyŋ halyqaralyq tūsaukeser räsımı öttı.
8 jyl boiy Astana künı mausymda atalyp keldı. Al 2006 jyldan bastap meiram 6 şıldege - Qazaqstannyŋ tūŋǧyş prezidentı, Elbasy Nūrsūltan Nazarbaevtyŋ tuǧan künıne auystyryldy. Biyl memleket basşysy Qasym-Jomart Toqaevtyŋ jarlyǧymen Astananyŋ atauy Nūr-Sūltan bolyp özgertıldı.
Biyl Astana künın toilauda qandai özgerıs bar?
Biyl Astana künıne arnalǧan şaralar üş esege qysqaryp otyr. Qala äkımınıŋ orynbasary Erlan Kanalimovtyŋ aituynşa, osy uaqytqa deiın qala künı aiasynda 300 şara ūiymdastyrylsa, aǧymdaǧy jyly atalǧan körsetkış 100-ge deiın qysqartyldy. Basym bölıgı tegın bolady. Osynyŋ bärıne şamamen 300-400 million teŋge jūmsalmaq. Būl qarajat mädeni-sporttyq şaralardy ūiymdastyruǧa ǧana emes, qalany abattandyruǧa da jıberıledı. "Astana künı osymen 21 ret toilanyp otyr. Būl kün elordalyqtardyŋ ǧana emes, barşa qazaqstandyqtyŋ süiıktı meiramyna ainaldy. Jazǧy uaqyt, sosyn bırneşe demalys künı bar. Qalaǧa basqa öŋırlerden keletın adamdar köp. Özımızdıŋ 1,1 million tūrǧynymyz bar. Oǧan qosa, şeteldık turister köp keledı", - dedı Kanalimov ortalyq kommunikasiialar qyzmetınde ötken baspasöz mäslihatynda.Nūr-Sūltanda qandai şaralar ötedı?
Osy joly qazaqstandyq jäne reseilık estrada jūldyzdarynyŋ qatysuymen ötetın OPEN AIR, aşyq aspan astyndaǧy gala-konsert, ortalyq alaŋdarda ūiymdastyrylatyn jappai sauyq-sairandy ötkızbeitın boldy. Nūr-Sūltan qalasynyŋ mädeniet jäne sport basqarmasy taratqan mälımetke säikes, qalanyŋ bırneşe jerınde mädeni-sporttyq şaralar ūiymdastyrylady.- Balalar şyǧarmaşylyǧyna arnalǧan "Şattyq" halyqaralyq festivalı (Qalalyq alaŋ, 10:00);
- Kadetter arasyndaǧy küres türlerı boiynşa Aziia chempionaty ("Däulet" sport keşenı, 11:00);
- Jauyngerlık öner festivalı (Jekpe-jekter saraiy, 15:00);
- Nūr-Sūltan äkımınıŋ kubogy üşın karaokeden chemionat (Esıl özenınıŋ jaǧasy, amfiteatr, 15:00);
- Ürmelı orkestrler şeruı (Qalalyq alaŋ, 16:00);
- Boks keşı ("Barys-Arena" mūz aidyny, 17:00);
- "Sovremennik" tearynyŋ gastrolı (Beibıtşılık jäne kelısım saraiy, 17:00);
- Köşe biıne arnalǧan International Street dance Session in Astana festivalı (Qalalyq alaŋ, 19:00);
- Spirit of Eurasia halyqaralyq festivalı (EKSPO aimaǧy, 18:00).
Derekköz: sputniknews.kz
"Adyrna" ūlttyq portaly
