Sý tasqyny oryn alǵan óńirlerde qazirgi esep boıynsha 8,1 myń bas mal qyrylǵan, dep habarlaıdy "Adyrna" tilshisi.
Qyrylǵan mal ıeleri ótemaqy ala alady. Bul týraly Aýyl sharýashylyǵy mınıstrliginiń resmı ókili Oljas Tilebaldın 10 sáýir kúni ótken brıfıngte aıtty. Onyń sózinshe oblys ákimdikteri men Aýyl sharýashylyǵy mınıstrliginiń birlesken jumysynyń arqasynda 88 myńnan astam aýyl sharýashylyǵy janýarlaryn qaýipsiz jerge shyǵarylǵan.
"Jedel derekter boıynsha ólgen mal sany 8,1 myń bas, onyń ishinde usaq mal – 6 myń, iri qara – 1,5 myń, jylqy – 514 bas. Respýblıkalyq epızootııaǵa qarsy otrıad turaqty epızootııalyq jaǵdaıdy saqtaý maqsatynda janýarlardyń ólekselerin joıý jumystaryn qarqyndy jalǵastyrýda. Búgingi tańda 4,1 myń mal ólekseleri joıyldy. Premer-mınıstrdiń tapsyrmasy boıynsha bul jumys kúsheıtilgen rejımde jalǵasatyn bolady. Sý tasqynyna qarsy is-sharalardy úılestirý jáne sý tasqyny kezeńiniń zardaptaryn joıý jónindegi respýblıkalyq shtabpen ólgen mal ıelerine ótemaqy tóleý algorıtmin ázirlep, bekitildi. Menshik ıeleri men zalaldy anyqtaý jáne basqa da máselelerdi sheshý úshin óńirlerde jergilikti atqarýshy organdarmen shyǵyndy anyqtaý jónindegi komıssııa quryldy”, – dedi Oljas Tilebaldın.
Mal ıeleri málimetterdi kórsete otyryp, jergilikti komıssııaǵa ótinish berýi kerek. Menshik quqyǵy komıssııalardyń aktilerimen rastalady. Al menshik ıelerine ótemaqy Ulttyq statıstıka bıýrosy jarııalaǵan talapqa saı beriledi.
