Arys qalasynda atqarylyp jatqan jūmystar men mälımetter şynaiy ärı aşyq boluy kerek. Bügın oblys äkımı apparatynyŋ kezektı selektorlyq jiynynda öŋır basşysy Ömırzaq Şökeev osylai dedı. Qorǧa audarylǧan qarjy men memleket tarapynan berıletın ärbır qarajat ta qoǧam nazarynda bolady.
«Ärine, qysqa merzımde qalany qalpyna keltıru oŋai emes. Memleket tarapynan qoldau körsetılıp, auqymdy jūmystar atqarylyp jatyr. Bıraq älı de eldı arandatqysy keletınder bar. Solarmen jeke jūmys jürgızılsın. Ärbır salaǧa jauapty basşylar, äsırese, äskeriler men özge de qūzyrly organdar aqparatty aşyq ärı uaqtyly berıp tūrsyn. Sonda ǧana ıs alǧa basady. Keibır jıgıtter älı qorqynyştan aryla almai jür. Üreiden arylyp, ıske kırısken jön. Arysta tırkelgen ärbır adamǧa 100 myŋ teŋge berıledı, üilerı jöndeledı. Eşkım qoldausyz qalmaidy», – degen öŋır basşysy barlyq jauapty basşylar men mamandarǧa jūmysty küşeitıp, sapaly ärı uaqtyly aiaqtaudy tapsyrdy. QR Qorǧanys ministrlıgı bas ştabynyŋ bırınşı orynbasary R.Şpekbaevtyŋ aituynşa, äskeri mamandardan qūralǧan 42 top Arystyŋ maŋyndaǧy 10 şaqyrym aumaqty tügel tekserıp, oq-därılerden tazartyp şyqqan. «Saperlar Arys qalasymen bırge Aqdala, Dermene auyldaryn tekserıp şyqty. Mamandarymyz barlyq aumaqty baqylap otyr Qazırgı taŋda äskeri qoimadan oq-därıler köşırılıp jatyr. Qaladan 60 şaqyrymdai aumaqtaǧy arnaiy poligonda oq-därını joiu jūmystary jüredı. Sondyqtan keide saǧat 9 ben 18.00 aralyǧynda bırdı-ekılı jarylys dauysy estıluı mümkın. Bıraq tūrǧyndarǧa jaǧdai tolyq baqylauda ärı qauıpsız ekenın aitqym keledı. Alaŋdauǧa negız joq», – dedı ol. Al Türkıstan oblysynyŋ polisiia departamentınıŋ bastyǧy Qairat Dälbekov eldı arandatu, jalǧan aqparat taratu, zaŋsyz şeruge şyǧu derekterı boiynşa 10 adam ūstalyp, tüsındıru jäne tergeu jūmystary jürgızılgenın mälımdedı. 4 qylmystyq ıs qozǧalǧan. Oblys äkımınıŋ keŋesşısı Ūlasbek Sädıbekov barlyq sektorlar men ştabtarda tūrǧyndardyŋ talap-tılegı tyŋdalyp jatqanyn jetkızdı. Gumanitarlyq kömek uaqtyly taratylyp, üilerı jaramsyz küige tüsken otyzǧa juyq otbasymen kezdesu ötkenın, qoldau körsetılgenın aitty. Oblys äkımı Ömırzaq Şökeev tūrǧyndarmen tiıstı jūmys jürgızıp, olardyŋ mäselelerın tyŋdau, şeşu jönınde tapsyrma berdı. Sondai-aq Arys qalasynyŋ ziialy qauymy men belsendı azamattaryn, jergılıktı atqaruşy organ men deputattaryn, aqsaqaldaryn da belsendı boluǧa şaqyrdy."Adyrna" ūlttyq portaly
