Prozaǵa qoıylatyn talaptar kúsheıgen zamanda kólemdi týyndy túgil, jazǵan áńgimeńdi de elge oqytý ońaı emes. Soǵan qaramastan jazýshy Qanat Ábilqaıyrdyń «Aǵyraptaǵy aty joq adam» atty búgingi kúnniń shyndyǵyn sýretkerlik sheberlikpen jetkizgen romanyn bas almaı oqyp shyqtym.
Sóılemderin tym kúrdelendire bermeı, bir oqıǵadan soń ekinshisi jetelep, sońyna jetkenshe yntyqtyryp, sıqyrly áleminiń órisine magnıtteı tartyp áketetin týyndy úsh aıda jazylǵanymen, bul roman avtordyń qazan mıynda uzaq jyldar boıy qaınatylyp, tolǵaǵy kelgen sátte týa qalǵan shyǵarma sııaqty bolyp kórinedi maǵan. Shyǵarmada adamdardyń taǵdyrynan bólek, dinı sektalar taqyryby, túrme taqyryby t.s.s. birneshe taqyryptar bar.
Romandy oqý barysynda avtordyń osy taqyryptardy jan-jaqty zerttegenine kóziń jete túsedi. Baspanasyn qorǵaımyn dep taǵdyry tálkekke túsken bir adamnyń ómiri arqyly búkil bir ulttyń tragedııasyn sýretteıtin týyndyny tebirenbeı oqý múmkin emes.
Adam ómirde izin qaldyrý úshin teńine qosylyp, shańyraq kóterip, urpaq súıýi tıis. Al, osyndaı nyǵmetterdiń bárinen aıyrylǵan pendeni artyna iz qaldyrǵan, aty bar adam deýge bola ma? Bas keıipkerdiń myna jalǵan dúnıeden turaq taba almaı shermende kúıge dýshar bolýyna kináli kimder? Avtor mundaı kúrmeýi kúrdeli suraqtyń jaýabyn izdeýdi oqyrman enshisine qaldyrady.
Amangeldi Myrzabek
