17 sáýir Qazaqstan Kınematografıster Odaǵynyń XVI sezi ótti. Bul týraly Ulttyq ónerdi dáripteýshi, dástúrli ánshi Erlan Tóleýtaı Facebook paraqshasynda jazdy, dep habarlaıdy “Adyrna” ulttyq portaly.
Ulttyq kitaphanada ótken kezekti sezge Kınogerler Odaǵyna múshe qaýymnyń basym kópshiligi jıyldy. Aldymen, burynǵy basshylyqtyń esebi tyńdalyp, oǵan qanaǵattandyrarlyq degen baǵa berildi.
Jıyn barysynda Kınogerler Odaǵynyń músheleri jańa tóraǵa saılaý úshin óz daýystaryn berdi. Ashyq daýys berý nátıjesinde Kınogerler Odaǵynyń jańa basshysy bolyp, anımaııalyq kıno rejısseri ári kıno prodıýsser Adaı Ábilda saılandy.
Jańa ári jas tóraǵaǵa qazaq kınosynyń aqsaqaly Asanáli Áshimov aq batasyn berdi.
«Jalpy, kınogerler qaýymy bul tańdaýlaryna kóńilderi tolǵan syndy. Sebebi Adaı Ábildá – kıno tóńiregin dendegen korrýpııaǵa, osy saladaǵy basqa da bylyq-shylyqtar men túrli ádiletsizdikterge qarsy ymyrasyz maıdan ashqan Ulttyq kıno tarıhyndaǵy alǵashqy sheneýnik. Osy ymyrasyzdyǵy úshin 2022 jyly Ulttyq kınony Memlekettik qoldaý ortalyǵynyń Bas prodıýsseri qyzmetinen ketken ol sodan beri jumyssyz qalǵan edi. (Bıliktiń jemqorlyqpen kúresýshi tulǵalprdy qyzmetten shettetetini qyzyq) Endi mine, Kınogerler Odaǵynyń músheleri kópshilik daýyspen Adaı Qunanbaıulyn Kınematografıster Odaǵynyń tóraǵasy laýazymyna bekitti», dep jazdy Erlan Tóleýtaı.
Sondaı-aq, Erlan Tóleýtaı Ulttyq kıno tóńireginde sheshilmegen másele kóp ekenin aıta ketti.
«Kınogerler Odaǵy músheleriniń orta jasy 65 jas muǵdary ekendigin eskersek, bul ózi aǵa býynnyń tańdaýy bolǵan sekildi. Sebebi aǵa býyn uzaq jyldar boıy Ulttyq kınony damytýǵa qyzmet etetin qolaıly ózgerister jasaı almady, Jasamaq bolǵan talpynystary únemi sátsizdikke ushyraýmen boldy. Sol sebepti Ulttyq kınonyń ahýaly jyl saıyn nasharlap keledi, sonyń belgisindeı qazaq kınosynyń qara shańyraǵy – Sháken Aımanov atyndaǵy "Qazaqfılm" kınostýdııasynyń keteýi ketip, bar maǵynasynda kúıregeli tur. Kınoǵa bólinetin qarjy jyl saıyn qysqara túsýde ári kıno túsirý Mádenıet mınıstrligine kıno ónerin ábden qor qylǵan ári kıno úshin tekke keregi doq fınanstyq otchettar men basqa da bıýrakratııalyq qujattar úshin túsiriletin, esh máni joq, eshqandaı shyǵarmashylyq ári qarjylyq normatıvter saqtalmaıtyn maǵynasyz kúldibadam birdeńege aınalyp barady. Qysqasy, Ulttyq kıno tóńireginde sheshilmegen máseleler shash etekten jáne bul keleńsizdikter jyl saıyn qordalana túsip, sheshimin tappaǵan osynaý problemalar ýaqyt ótken saıyn asqynyp, ýshyǵyp keledi. Osy oraıda aǵa býyn kınogerler Odaq tizginin "Jas kelse iske", – dep Adaı Ábildáǵa ustatqandaı. Nesi bar, Adaı jas ta bolsa, kıno óndirisiniń kásibı mamany, eń bastysy ol jastaıynan kıno isiniń ystyǵyna kúıip, sýyǵyna tońa júrip shyńdalǵvn azamat. Qazirgi kezde kıno óndioisinen esh habary joq bıliktiń súıiktileri men olarǵa yńǵaılylar Kıno basshylyǵyna kelip jatqanda bul tańdaýdy kınogerlerdiń osy keleńsizdikke qarsy protesi dese de bolǵandaı. Sóıtip, beınelep aıtqanda, Kınematografıster Odaǵyna "Eski Qazaqstan", ketip, "Jańa Qazaqstan" keldi ıaǵnı kınogerler qaýymy ózderine jas tóraǵa saılaý arqyly ózgerýge beıildi ekenin tanytty», dedi ol.
Erlan Tóleýtaıdyń aıtýynsha, mundaı ózgeristi Ulttyq Kınonyń basy-qasynda júrgen sheneýnikter qoldamaıtyn sekildi. Óıtkeni, Kınematografıster Odaǵynyń kezekti XYI sezine arnaıy shaqyrý jiberilse de – Mádenıet jáne Aqparat mınıstrliginen birde-bir ókili, Ulttyq kınony qoldaý ortalyǵynyń da basshylary kelmegen. Tipti, "Qazaqfılm" basshysy da tóbe kórsetpedi.
«Bar maqsat-muraty tek kıno túsirý ǵana bolyp, qońtorǵaı kúı keshýli kınoger qaýymǵa bılik nege búıtip qyr kórsetedi? Ásirese, qazaq kınosynyń qos alyby, bul kúnde jastary toqsanǵa taıaǵan Asanáli Áshimov pen Nurjuman Yqtymbaev aqsaqaldarymyzdan yńǵaısyzdaý boldy. Ulttyq kınomyzdyń qos korrıfeıi – mundaı múlde elemeýshilikti kınoǵa túsip bastaǵan 65 jyldyq ǵumyrlarynda alǵash kóripti.
Shynynda da Jazýshylar Odaǵynyń quryltaıy dese, esebi kúlli PÁ sonda júredi de, al Kınogerler Odaǵynyń sezinde bılikten tiri jan tóbe kórsetpeıdi. Osyǵan "Apam da ań-tań, men de ań-tań" boldyq qysqasy», dedi Erlan Tóleýtaı.
