37 eldıŋ ökılı BŪŪ-na bırıgıp hat jazyp, Pekinnıŋ Şyŋjaŋdaǧy saiasatyn qoldaitynyn mälımdegen. Hatqa qol
qoiǧandar arasynda Resei, Saud Arabiiasy da bar. Būl aqparatty 12 şıldede hattyŋ köşırmesın körgen Reuters agenttıgı habarlady. Däl osynyŋ aldynda 22 eldıŋ elşılerı BŪŪ-nyŋ Adam qūqyǧy jönındegı keŋesıne hat joldap, Qytaidyŋ az ūlttarǧa onyŋ ışınde ūiǧyr, qazaq, qyrǧyz jäne özge etnikalyq toptarǧa jasap otyrǧanyn qysymyn aiyptaǧan edı.
Pekin saiasatyn qoldaitynyn jetkızgen hat avtorlary Qytaidyŋ "adam qūqyǧy salasyndaǧy jetıstıkterın" maqtaǧan.
"Terrorizm jäne ekstremizm siiaqty ırı qauıp-qaterge kezıkken Qytai Şyŋjaŋdaǧy terrorizm men radikalizmmen küresu üşın bırqatar şara qoldandy, käsıbi bılım beru jäne oqytu ortalyqtaryn aşty" delıngen hatta.
Oǧan 37 eldıŋ ökılı qol qoiǧan. Hatta sonymen bırge Şyŋjaŋda barlyq etnikalyq toptardyŋ negızgı qūqyqtary saqtalatyny, Pekin äreketınıŋ arqasynda "aimaqtaǧy jaǧdaidyŋ qauıpsız bola bastaǧany", soŋǧy üş jylda mūnda terroristık şabuyl bolmaǧany aitylady. Hat avtorlary būǧan qosa Şyŋjaŋ tūrǧyndarynyŋ "baqytty ärı tatu-tättı ömır sürıp jatqanyn" atap ötken.
Hatqa qol qoiǧan elder arasynda Saud Arabiiasy, Resei, Soltüstık Koreia, Venesuela, Kuba, Belarus, Mianma, Filippin, Mianma, Siriia, Päkıstan, Oman, Kuveit, Katar, Bırıkken Arab Ämırlıkterı, Bahrein bar.
Pekin aimaqta adam qūqyǧy būzylyp jatyr degen derektıŋ bärın joqqa şyǧarumen keledı. BŪŪ janyndaǧy Qytaidyŋ tūraqty ökılı Siui Chen jūma, 12 şıldede BŪŪ-nyŋ Adam qūqyǧy boiynşa qorytyndy jiynynda Qytai bilıgı mūndai qoldaudy "qatty baǧalaidy" dedı.
Şyŋjaŋ aimaǧyndaǧy lagerler jaily alǧaş ret 2017 jyldyŋ köktemınde aityla bastaǧan. BŪŪ Şyŋjaŋdaǧy "saiasi tärbieleu ortalyqtarynda" millionǧa juyq adam "erkınen tys" qamauda otyrǧanyn, olardyŋ arasynda ūiǧyrlar men qazaqtar baryn mälımdegen.
Qazaqstannyŋ bırneşe qalasynda azamattar jinalyp, "Şyŋjaŋda jaqyndarymyz qysym körıp jatyr, lagerde otyr, Qazaqstanǧa öte almaidy" degen. Olar Qazaqstan bilıgınen, halyqaralyq ūiymdardan kömek sūraǧan. Qazaqstan syrtqy ıster ministrlıgı «Şyŋjaŋdaǧy lagerler Qytaidyŋ ışkı mäselesı, onda qamauda otyrǧan qazaqtar Qytai azamaty» degen. Keiın ministrlık Pekinmen kelıssöz jürgızıp, Şyŋjaŋnan bergı betke öte almai qalǧan qazaqtardyŋ mäselesı şeşılıp jatqanyn aitqan.
Qytai ükımetı basynda saiasi tärbieleu ortalyqtarynyŋ baryn joqqa şyǧaryp keldı. Keiın Pekin Şyŋjaŋdaǧy saiasatyn "ekstremizmge qarsy şara" dep atap, adamdar erkınen tys otyrǧan lagerlerdı "tıl üirenıp, käsıpke baulityn " ortalyqtar dep tüsındırgen edı.
"Azattyq" radiosy
