Qazaqstan aýmaǵynda atom elektr stanııasyn salý máselesi boıynsha referendým osy jyldyń sońynda ótýi múmkin ekeni aıtyldy. Bul týraly Qazaqstannyń Reseıdegi elshisi Dáýren Abaev TASS agenttigine málimdedi, dep habarlaıdy “Adyrna” ulttyq portaly.
Tilshiler Abaevtan Qazaqstannyń AES salýdaǵy "Rosatommen" baılanysy týraly surady. Abaev oǵan:
«Memleket basshysy óziniń saılaýaldy tuǵyrnamasynda da kez kelgen strategııalyq mańyzdy máseleler jáne ózge de dúnıeler referendýmda sheshiletinin, ıaǵnı halyqtyń pikirimen sanasý kerektigin nyq aıtty. Bul onyń berik ustanymy jáne meniń oıymsha, qazaqstandyqtar muny oń baǵalaıdy. Biz muny referendýmǵa shyǵaryp otyrmyz. Qazaqstanda atom energııasyna qatysty belgili bir fobııalar bar. Semeı ıadrolyq polıgony uzaq ýaqyt boıy Qazaqstan aýmaǵynda ornalasyp, respýblıka tarıhynda da, qazirgi qalpyna deıin de úlken iz qaldyrdy. Bul jarylystardyń saldary áli de sezilýde. Sondyqtan bul Qazaqstandaǵy biz úshin ózekti másele. Eger Qazaqstan halqy bul úderisterdi qoldasa, referendýmnan keıin birden naqtysy aıtylady. "Rosatom", árıne, osy saladaǵy kóshbasshylardyń biri, sondyqtan mundaı sheshim qabyldansa, Rosatom árqashan qysqa tizimde bolady” dep jaýap berdi ol.
Sondaı-aq, sheteldik BAQ-tyń jýrnalısi elshiden referendýmnyń ótetin merzimi belgili me dep suraǵan bolatyn.
«Joq. Osy jyldyń sońynda ótýi múmkin», - dep jaýap berdi Abaev.
Byltyr qyrkúıekte prezıdent Qasym-Jomart Toqaev el aýmaǵynda atom elektr stanııasy salynyp-salynbaıtynyn halyq referendým arqyly sheshetinin málimdedi.
