Aǧadyr kentınen jüiıtkıgen kölıgımız şūŋqyry köp sürleu jolǧa tüstı. Maŋ jazyq dalanyŋ sonau köz ūşyndai jerınde qarauytqan şoqy töbeler kölbeŋdeidı. Qazaǧymnyŋ keşegı sūrapyl tarihtarynyŋ taŋbalary osy dalany äbden aiǧyzdaǧany körınıp tūrǧandai. Menıŋ qalyŋ oiǧa şomyp ketkenımdı baiqasa kerek, janymda otyrǧan äkem iyǧyma qol salyp: «Būl – bızdıŋ tuǧan jerımız. Ata-babalarymyzdyŋ kındık tamǧan topyraǧy. Būl jer menıŋ, senıŋ, senıŋ balalaryŋnyŋ maqtan tūtarlyq mekenı boluǧa tiıs. Öitkenı azamattyŋ maqtanarlyq tuǧan jerı bolmasa, onda onyŋ öşkenı», dep kürsındı. Menıŋ de kındık qanym osy jerge tamǧan. Alaida äke-şeşem jūmys babymen Almatyǧa köşıp, būl aimaqqa jylyna bır ret qana taban tıreitınbız. Onda da, bala künımızde köp uaqyt jüretınbız. Keiın uaqyt öte kele būl qystaqqa at basyn būrudy azaittyq. Emıs-emıs esımde qalǧany keŋ jailau men qoraly qoi, jaiylǧan jylqy...Kün ūzaq asyq oinap, dop tebetınbız. Kün tas töbege köterılgen şaqta jailaudaǧy balalar özenge şomyluǧa baratynbyz. Köz aldymnan kölbeŋdegen osy körınısterden boiymdy saǧynyş bilegenın baiqamai da qaldym.
Bızdı qūşaq jaia qarsy alǧan kısını döp basyp tani almadym. Äkemmen arqa-jarqa amandasqan ol maǧan būrylyp: «Azamat boldy degen osy! Tuǧan jerdıŋ topyraǧy tartar dep edım. Kelgenıŋe öte quanyştymyn», dep menı bauyryna qysty. Menıŋ tosyrqap tūrǧanymdy baiqasa kerek, äkem: «Būl – ataqty Säken Seifullinnıŋ ūrpaǧy, jalǧasy, tütının söndırmei otyrǧan ülken azamat», dep tanystyrdy. «Aǧadyrǧa kelseŋ, mūndaǧy barlyq qazaq Säkennıŋ ūrpaǧymyz dep maqtana, marqaia aitady» dep küldı Azamat aǧa. Aldaǧy ekı apta uaqytym osy Azamat aǧanyŋ janynda öttı. Azamattyŋ azamattyǧyna täntı boldym. Talai kıtap oqydym, talaidy bılemın degenım Azamat aǧanyŋ qasynda tük bolmai qaldy. Bızdıŋ ata-babalarymyz ben olarǧa qatysty tarihi mälımetterdı aitqanda, Azamat aǧa auzyna qaratady eken. Solardyŋ eŋ qyzyqtysy – Säken Seifullinge qatystysy boldy. Säken Seifullinnıŋ qazaq tarihyndaǧy aty men ömır joly bärıne belgılı ǧoi. Alaida Säkennıŋ tuǧan jerıne degen erekşe sezımı turaly derekter sirek. Azamat aǧanyŋ aituynşa, Säken Seifullin osy qystaqta, qazırgı Qaraşılık qystaǧynda köp şyǧarmany düniege äkelıptı. Sonau jerlerde äldekım ädeiı şaşyp ketkendei qoitastar jatyr. Mıne, osy qoitastar Säkennıŋ süiıktı mekenınıŋ bırı bolypty. Säken quǧynda jürgende jasyrynyp jatqan üŋgırdı de kördık. Elınıŋ erteŋı üşın basyn ölımge tıkken arda azamatymyz osy üŋgırde jatyp ne oilady eken? El auzynda Säken qystaǧy atalǧan būl jer menı özıne bırden baurap aldy. Bälkım, kındık qanym tamǧan kielı meken bolǧandyqtan da, osy mekenge jıpsız bailanǧan bolarmyn. Desek te, endıgı ömırımdı tuǧan jerımnıŋ törınde, tarihi syrǧa qoiny tolǧan Qaraşılıkte jalǧastyrudy jön sanadym. Öitkenı, men Alaştyŋ ardaqty azamaty Säkennıŋ qazırgı ūrpaǧynyŋ bırımın. Menıŋ endıgı azamattyq boryşym – osy tuǧan jerımdı güldendıruge, osy mekendı jerdıŋ jännatyna ainaldyruǧa küş salu bolmaq. Säkendei alyp tūlǧany tanytqan jer – menıŋ de maqtanyşyma ainalary sözsız. Osyndai oimen maŋ dalaǧa jaiǧasqan Qaraşılıkke tuymdy tıktım. Öitkenı būl – tuǧan jer aldyndaǧy menıŋ azamattyq boryşym.
Oljas Smaǧūlov Būl maqala Azamattyq bastamalardy qoldau ortalyǧynyŋ
«Tuǧan jer» granttyq jobasy aiasynda jazyldy.
"Adyrna" ūlttyq portaly
