Kún saıyn úkimettiń engizip jatqan jańa bir zańyna qaryq bolyp jatyrmyz. Solardyń biri "Qazaqstan Respýblıkasynyń keıbir zańnamalyq aktilerine zeınetaqy máseleleri boıynsha ózgerister men tolyqtyrýlar engizý týraly" 2015 jylǵy 2 tamyzdaǵy Qazaqstan Respýblıkasynyń Zańy. Ózgeris bolǵanda jáı ózgeris emes. Sumdyq ózgeris. Qazaqstan Respýblıkasynyń Zańy boıynsha qyzmetkerdiń jeke zeınetaqy shotyna aı saıyn jalaqynyń 15 paıyzy aýdarylyp otyrady. Iaǵnı 10 paıyzy - qyzmetkerdiń mindetti zeınetaqy jarnalary, 5 paıyzy - jumys berýshiniń óz qarajaty esebinen zeınetaqy jarnalary.
Mınıstrliktiń málimetinshe, bul jańashyldyq barlyq jumys isteıtin azamatqa, onyń ishinde jeke kásipkerler jáne jeke praktıkamen aınalysatyn adamdarǵa qoldanylady. Jumys berýshilerden kelip túsken zeınetaqy jarnalary jeke tulǵalardyń menshigi bolyp sanalmaıdy jáne muraǵa qaldyrylmaıdy. Bul qarajat BJZQ aktıvinde bolady jáne zeınetkerler arasynda qaıta bólinedi.
Al bul jóninde ekonomıst Dáýlet Tóleýtaıuly: "Kelesi jyldan (2020 jyl, 1 qańtar) bastap zeınetaqy qoryna 15% paıyz ustalynady! 10+5(jumys berýshi). Osylaısha, ENPF-qa aı saıyn 35 mlrd teńge túsip turady. Sol 5%-dan túsken aqsha mura retinde qalmaıdy. Iaǵnı, ólip ketken jaǵdaıda ol aqsha ózgeniń pensııasyn tóleýge ketedi. Aınalyp kelgende qarapaıym halyqtyń jınaǵan aqshasy, jyly kresloda otyryp pensııaǵa ketken, uzaq ómir súretinderdi asyraıdy " dese eńbek jáne áleýmettik qorǵaý mınıstriniń baspasóz hatshysy: Qazaqstanda ortasha aılyq 172000 teńge dep alyp, sol adam 33 jyl eńbek etse, 10% júıemen pensııaǵa shyqqanda (63 jasta) 140 myń teńge alady. Al 15% bolsa, pensııaǵa shyqqanda 190.000 alady dep halyqty jubatýda.
Alaıda zeınetke shyǵý jasyn bylaı qoıǵanda, erteńgi kúndi boljaı almaı otyrǵan bizge bul jańalyq kókten túskendeı boldy. Qysqasy, kenetten ólim qushyp jatyp, artyńyzdaǵy urpaqqa bir tıynyńyz qalmasa, ókinbeńiz! Uzaq ómir súrmegen ózińiz kinálisiz...
Aqgúl AIDARBEKOVA
"Adyrna" ulttyq portaly
