“Ärbır mäselenı tılge äkelıp tıreu – mädenietsızdık“

Baspasöz mäslihatynda qazaq tılınde sūraq qoiǧan jurnaliske şüilıkken futboldan Qazaqstan qūramasynyŋ bapkerı Stanislav Cherchesovty jaqtauşylar tabyldy, dep habarlaidy “Adyrna” ūlttyq portaly. Älışer Iliiasūly esımdı jelı qoldanuşysy bas bapkerdıŋ synǧa alǧan köpşılıkke ündeu joldady: “Bügın äleumettık jelıde talqyǧa tüsıp jatqan bır mäselege közıme tüstı. Ol futboldan Qazaqstan qūramasynyŋ bas bapkerı bolyp taǧaiyndalǧan reseilık bapker Stanislav Cherchesov jaiynda. Osetin ūltynyŋ ökılıne qazaqstanstandyq jurnalister qaita-qaita qazaqşa sūraq qoiyp, saualdyŋ astyna alǧan syŋaily. Bastapqyda qazaqşa qoiǧan sūraqty QFF prezidentı Ädılet Barmenqūlov myrzanyŋ orysşaǧa audaryp bergenı de toqtam bolmapty. Qalai desek te, elge qyzmet etuge kelgen mamannan jūmysyna qatysty nätije talap etpei, tıldık mäsele töŋıregınde dau qozdyrudy qūptamaimyn. Bırınşıden, osetindık azamattyŋ qazaq tılın bılmeitını aidan anyq. Būl uaqyttyŋ enşısındegı dünie. Qazır federasiia Stanislav Cherchesovtıŋ qazaqşa üirenıp jatqany turaly aqparat jariialady. Sondyqtan, jaŋa kelgen bapkerdı jaǧadan alu mädeniettılıkke jatpaidy. Ekınşıden, tıl, dın sekıldı näzık taqyryptarda memlekettık tūrǧydan oilap, eldıŋ abyroiyn da esten şyǧarmaiyq. Eger şet elden kelgen är mamanǧa jūmys ısteuge mümkındık bermei, qazaqşa söileuın ǧana talap etsek, şeteldıkter bızdıŋ el turaly ne oilaidy? Üşınşıden, jurnalister qaşanda käsıbilık tanytuǧa tiıs. Tılşınıŋ mındetı obektivtılık, köterılgen mäselenı köpke jetkızu, şynaiy aqparat taratu. Al jurnalist taqyryptan auytqyp, mın ızdep, basqa jaqqa būra tartsa, qalai bolǧany? Aldyna kelgen mamannan qazaq futbolyn qalai damytatynyn, qandai jaŋalyq alyp keletının sūrasaq, mäsele basqa edı. Sondyqtan būl jerde ūltşyldyqqa saludyŋ, arazdyq qozdyrudyŋ qajetı joq. Eŋ bastysy eldık müddege jūmylyp, käsıbilıktıŋ, biık mädeniettıŋ şekarasynan attamai, baiyptylyq tanytqan abzal dep oilaimyn” delıngen onyŋ jazbasynda. Esterıŋızge sala keteiık, būǧan deiın Cherchesovtyŋ qazaqşa sūraq qoiǧan jurnaliske narazylyq tanytqanyn jazǧan bolatynbyz.