Qyzylordalyq aqyn Nurmuhammed Ábilqasymovtyń shańyraǵynda úlken toı! Jubaıy egiz balany dúnıege ákeldi. Bul týraly belgili aqyn Maraltaı Raıymbekuly facebook áleýmettik jelisindegi paraqshasyna jazdy, dep habarlaıdy «Mádenıet portaly». Maraltaı Raıymbekuly: «Búgin tań atpaı súıinshi xabarmen oıandym. Qyzylordalyq aqyn inim Nurmuxammedtiń úıindegi kelin ómirge bir ul, bir qyz ákelipti! Qurmetti Nurmuxammed baýyrym ul men qyzyń aman-esen ósip ózińe qolqanat bolsyn! Sen naǵyz Erliktiń úlgisisiń!!!», - dedi.
Múmkindiginiń shekteýligine qaramastan Nurmuhammed aqyn birneshe jyr jınaqtyń avtory. Ol ómirdegi barlyq qıyndyqty tózimmen, sabyrmen jeńgen aqyn. Óleńderin aýzyna taıaqsha tistep uıaly telefonǵa ǵana habarlama túrinde jazyp, ne bary 4-5 jyldyń ishinde aqyndyq álemde tóselip, eki jyr jınaq shyǵarǵan. Osydan birneshe jyl buryn Qyzylorda oblysynyń ákimi kezinde Qyrymbek Kósherbaev aqyn Nurmuhammed Ábilqasymovty qabyldap, talantty janǵa eki bólmeli páterdiń kiltin tabystaǵan bolatyn. Ol: «Tepse temir úzetin talaı jandar bos júr. Al seniń myna eńbegin naǵyz erlikpen para-par. On eki músheńniń túgel emestigine qaramastan ómir súrýge qulshynysyń joǵary. Jyr jınaqtaryńdy arnaıy oqyp shyqtym», – degen bolatyn.
Belgili aqyn Qalqaman Sarın de facebook áleýmettik jelisindegi paraqshasyna: «Onyń ómirge degen qushtarlyǵy kimdi bolsa da qaıran qaldyrmaı qoımas. Alla oǵan azappen qosa aqyndyqty berdi. Aýzyna jyńǵyl taıaqshasyn tistep jyr jazatyn aqyn esterińizde me?
Ol – Nurmuhammed! Meniń dosym, qurdasym, jaqynym. Biz uzaq syrlasatynbyz. Armandarym kóp deıtin. Sol asyl armandarynyń biri – otbasyn quryp, bala súıý bolatyn. Men de aqynnyń sol armany oryndalsa eken dep tileıtin edim. Mine, Qudaı taǵala sol kúnge jetkizdi. Tilegimiz qabyl boldy!
Nurmuhammed bir ul, bir qyzdyń ákesi atandy. Qajetimizdi suratpaı bergen, suraǵanymyzdy eselep bergen, egiz bergen Allaǵa sansyz madaq, sansyz shúkir!
– Ulymnyń atyn Qalqaman, qyzymnyń atyn Qaraqat qoıam dep, túnde qońyraý shaldy. Saǵan degen qurmetim, ruqsatyńdy ber! - deıdi...))
Qýanyshynda shek joq!
Eń bastysy, aman bolsyn dep tiledim!», - dep aǵynan jaryldy.
"Adyrna" ulttyq portaly
