XX ǧasyrdyŋ bas kezınde qazaqtar arasynda petisiialyq qozǧalys eleulı türde etek aldy. Halqymyz özınıŋ ömırlık maŋyzy bar şūǧyl mäselelerın petisiialar joldau arqyly şeşuge tyrysyp kördı. 1905 jyldyŋ 25 şıldesınde Qarqaralydaǧy Qoiandy järmeŋkesıne jinalǧandar patşa ükımetınıŋ otarlyǧyna qarsy petisiia qabyldady. Būl aq patşa zamanynda tūŋǧyş ret otarşyl imperiianyŋ basşylyǧyna joldanǧan salmaqty saiasi qūjat edı, dep habarlaidy «Adyrna» tılşısı.
Qarqaraly petisiiasynda ölkenı äkımşılık basqaru jüiesın qaita qarau, azamattyq jäne sot ısın qazaq tılınde jürgızudı zaŋdy türde bekıtu, otarşyl apparat şeneunıkterın qysqartu, joǧary bilık organdary men Memlekettık Dumaǧa qazaq deputattaryn sailauǧa qatystyru talaptary qoiyldy.
Petisiia mätını Resei patşasynyŋ atyna ǧana joldanyp qoiǧan joq. Onyŋ köşırmelerı «Syn Otechestva» jäne «Russkie vedomosti» siiaqty ortalyq gazetterde jariialanuy üşın basylym redaksiialaryna da jıberıldı.
«Qazaqtardyŋ müddesın kım qorǧaidy? Olardyŋ mūŋ-mūqtajyn kım bıledı, halyqtyŋ özı sailaǧan ökılderı bolmasa, sol halyqtyŋ tılegı men qajetın öteudıŋ joldaryn kım körsetedı? Qalai degende de bızdı äldekımderdıŋ tanyǧysy kelmeitınıne jauapty emespız. Patşa Aǧzam, Sızden basymyzdy iıp sūraimyz: Sailauǧa qatysuǧa erık berıŋız, memleket bilıgınde qazaqtar bolsa ǧana bızdıŋ mūŋ-mūqtajymyz eskerıledı jäne şeşıledı. Sonda ǧana bız, qazaq halqy, İmperiianyŋ basqa halyqtarymen teŋ ekenımızdı sezınemız», - delıngen petisiiada.
Aita keteiık, 1905 jyldyŋ 25 şıldesınde qabyldanǧan saiasi qūjatqa Abyraly bolysynan - Mūsa Qūlbaev, Süleimen Qoisoimasov, Aqbota bolysynan Jüsüp Qūlbatyrov, Bektıbai Botabaev, Börılı bolysynan Tolmūhamet Altyntorin, Raqiia Satpaev, Degeleŋ bolysynan Kerımhan Tölebaev, Tyşqanbai Qaşaqov, Temırşı bolysynan Sekerbai Qanǧojin, Ospan Janǧabylov qatarly azamattar bastaǧan myŋdaǧan adamdar qol qoidy.