Qazaqstannyŋ bırınşı, älemnıŋ törtınşı raketkasy Elena Rybakina Parijde ötetın olimpiada oiyndaryna qatysudan bas tartty, dep habarlaidy «Adyrna» tılşısı.
Olimpiadanyŋ resmi saitynda tennisşınıŋ esımı jeke jäne aralas jūptyq syndaǧy setkadan alynyp tastaldy. Endı otandasymyzdy avstraliialyq Daria Savil almastyratyn bolady.
Turizm jäne sport ministrlıgı Rybakinanyŋ törtjyldyqtyŋ bas dodasynda qatyspauyna densaulyq jaǧdaiy sebep bolǧanyn mälımdedı.
«Onyŋ Uimbldon turnirınen keiın tynys alu joldary qabynyp, ısınıp, auyrǧan. Soǧan qaramastan Elena daiyndalyp, olimpia oiyndarynda joǧary nätije körsetkısı keldı. Alaida därıgerler kortqa şyǧuǧa, ūşuǧa tyiym saldy», - dep jazdy ministrlıktıŋ baspasöz qyzmetı.
Aita keteiık, Qazaqstan Parij olimpiadasynda tennisten 6 lisenziia jeŋıp alǧan edı.
Būǧan deiın Rybakina Ūlybritaniianyŋ İstborn turnirıne qatysudan bas tartty.
