Belgılı fotograf suretterın zaŋsyz paidalanǧandardan ötemaqy öndırdı, dep habarlaidy “Adyrna” ūlttyq portaly Azattyq ruhyna sıltep.
Qazaqstandaǧy belgılı fotograf Tūrar Qazanǧap suretterın rūqsatsyz paidalanǧandardan 3,6 mln teŋge ötemaqy sūraǧan.
Onyŋ suretterın zaŋsyz paidalanǧan saitty sotqa berıp, 1,8 mln teŋge ötemaqy öndırıp aldy.
Is Almaty qalasynyŋ mamandandyrylǧan audanaralyq ekonomikalyq sotynda qaralǧan.
Fotograf suretterın rūqsat almastan paidalanǧan saittar turaly aitty. Sait suretke avtor atyn jazbaǧan, paidalanǧan suretterge syiaqy tölemegen.
«Sait fotograftyŋ dälelderın joqqa şyǧaratyn dälelder keltırgen joq. Sot taraptar ūsynǧan barlyq män-jailardy jäne däleldemelerdı eskere otyryp, fotograftyŋ talabyn ışınara qanaǧattandyrdy: jauapkerden 500 AEK (1,8 mln teŋgeden astam) ötemaqy öndırıldı», - dep habarlady Joǧarǧy sottyŋ baspasöz qyzmetı.
