Körşı Qyrǧyzstanda qazırgı prezident pen būrynǧy prezident arasyndaǧy talas atys-şabysqa ūlasyp kettı: Atambaevty tūtqyndau jönındegı arnaiy operasiia bastaldy. Tıkelei efirge qarasaq, qan tögılıp jatqan syŋaily!
Alataudyŋ ar jaǧyndaǧy ekı qoşqardyŋ basy bır qazanǧa syimai jatqanynyŋ sebepterı belgılı. Toqsan auyz sebeptıŋ tobyqtai tüiını – osy soǧystyŋ negızınde bilık pen bailyq jatyr. Kez kelgen jüiede osy ekı qūndylyq bır-bırımen astarlasyp jatatyny belgılı. Moiyndau kerek, demokratiialyq degen elderge de būl jat qūbylys emes.
Osy oqiǧanyŋ örbuıne qarap, köz aldyma Qazaqstandy elestetemın.
Bügınde bilıkke talasqan klandar arasyndaǧy tepe-teŋdıktıŋ formaldy kepılı bolyp otyrǧan Nazarbaev ömırden ötse, bızdegı jaǧdai qandai bolmaq?
Būryn da aityp jürmın, qazır de qaitalaiyn: bızde bır-bırıne jūldyzy qarsy, bır-bırın atarǧa oq taba almai otyrǧan, bes qaruy sai, iaǧni bilıkke qol jetkızuge qajet barlyq infraqūrylymy (kapital, menşık, mülık, biznes, bank, BAQ, qoǧamdyq qūrylymdar jäne adami resurs) bes-alty klan bar. Ärqaisysy – «sen tūr, men ataiyn»!
Erteŋgı künı, jeme-jemge kelgende sol «ataiyn» degenderı naqty ıske, atysqa ūlasyp ketuı äbden mümkın! Taq talasy jolynda azuyn Aiǧa bılegen olar, qajet bolsa, demokratiialyq ūrandardy köterıp, saiasi kürestıŋ barlyq mümkındıkterıne qaruly qarsylastyq sekıldı ädıs-täsıldı qosuy yqtimal!
Ol üşın ne ısteu kerek?
Ekı ǧana jol bar.
Bırınşıden, Qyrǧyzstanda qolǧa alynǧandai (Ukraina da sol jolǧa tüseiın dep jatyr) prezident, basqa da lauazymdy tūlǧalardyŋ immunitetın joiu kerek. Sonda ǧana olar halyq pen tarih aldyndaǧy jauapkerşılıktı ūmytpaidy, aqyryn jürıp, anyq basady. Erteŋgı künı jauapqa tartylatyndai qylmysqa barmaidy.
Ekınşıden, bır prezident özıne deiıngı prezidentten öşın alyp, jeke bas kegın qaitarmauy üşın bızge tūlǧalyq emes, ūjymdyq türdegı kepıldık kerek. Onyŋ aty – köppartiialy ärı atqaruşy bilıkke (prezidentke de!) täueldı bolmaityn Parlament! Atys-şabys emes, aitys-tartys sol parlamenttıŋ ışınde jūrıp jatsyn.
Sonda ǧana endı ǧana bastalyp jatqan tranzit kezınde elımızdıŋ Täuelsızdıgı men tūtastyǧyn saqtap qala alamyz!
Ämırjan QOSANOV
"Adyrna" ūlttyq portaly
