Jeŋıldıktı lizing 2024 – aralyq nätijeler

«QazAgroQarjy» AQ a.j. 12 tamyzynan bastap «Qazaqstanda jasalǧan», «Öz jem-şöbımız» jäne «6% jeŋıldıktı lizing» auyl şaruaşylyǧy tehnikasyn lizingke alu baǧdarlamalary boiynşa ötınımderdı qabyldaidy. Būl bastama zamanaui auyl şaruaşylyǧy tehnikasyna sūranysty arttyru jaǧdaiynda otandyq fermerlerdı qoldauǧa baǧyttalǧan. Auyl şaruaşylyǧy tauarlaryn öndıruşılerdı qarjylandyru üşın lizingtıŋ üş jeŋıldıktı baǧdarlamasy boiynşa 11,8 mlrd teŋge bölındı. Onyŋ ışınde «Öz jem-şöbımız» baǧdarlamasyna 3,3 mlrd teŋge, «Qazaqstanda jasalǧan» baǧdarlamasyna 5,5 mlrd teŋge, «6% Jeŋıldıktı lizing» baǧdarlamasyna 3 mlrd teŋge. «Baǧdarlamalar fermerler men agroönerkäsıptık keşenderge naryqtyq mölşerlemeden edäuır tömen jeŋıldıkpen jaŋa tehnikany satyp aluǧa mümkındık beredı. Traktorlardy, kombaindardy jäne arnaiy tehnikany qosa alǧanda, auyl şaruaşylyǧy maşinalarynyŋ keŋ spektrın lizingke aluǧa bolady», – dedı «QazAgroQarjy» AQ basqarma töraǧasy Aidar Praşev. Auyl şaruaşylyǧy ministrlıgınıŋ mälımetınşe, «Qazaqstanda jasalǧan» baǧdarlamasy boiynşa jyldyq 6% mölşerleme boiynşa otandyq öndırıstıŋ/qūrastyrudyŋ aspaly, tırkemelı jäne özdıgınen jüretın auyl şaruaşylyǧy tehnikasyn, kölık qūraldaryn satyp aluǧa bolady. Merzımı – 10 jylǧa deiın, aldyn-ala tölemı lizing nysanasynyŋ qūnynyŋ 15%-ynan bastalady. «Öz jem-şöbımız» baǧdarlamasy jem-şöp daiyndau tehnikasy men suarudyŋ mobildı jüielerın qarjylandyruǧa baǧyttalǧan. Mölşerleme  jyldyq 6%, avansy kemınde 15% qūraidy, merzımı 10 jylǧa deiın. Sondai-aq aldyn ala tölemdı keiınge qaldyru qarastyrylǧan. «6% jeŋıldıktı lizing»  baǧdarlamasy 10 jylǧa deiıngı merzımge aldyn-ala tölemsız jeŋıldıktı şarttarmen otandyq öndırıstıŋ/qūrastyrudyŋ özdıgınen jüretın auyl şaruaşylyǧy tehnikasyn lizingke satyp aluǧa mümkındık beredı. Ötınımderdı qabyldau Telegram-bot [https://t.me/kaz_agro_finance_bot] arqyly jüzege asyrylady. Baǧdarlamaǧa qatysu üşın «QazAgroQarjy» AQ filialyna barlyq qajettı qūjattardy Telegram-bot arqyly ötınım berılgen künnen bastap,  5 jūmys künı arasynda ūsynu qajet. Baǧdarlamalardyŋ şarttary turaly tolyǧyraq aqparatty kompaniianyŋ filialdarynan bıluge bolady