Elımızge atalmyş termindı alǧaş engızıp, qazaqşa kontenttı jaŋa arnaǧa būrǧan №1 avtobloger Oljas Oqasty tanymaityn jan kemde-kem şyǧar. Bügıngı materialda onymen elımızdegı qazaq tıldı önımderdıŋ ötımdılıgı, blogerlıkke kelu joly jaily tıldesıp kördık.
Bügıngı taŋda avtobloggerlıktı naǧyz käsıp dep sanauǧa bolady. Avtobloger - rejisserlık qabılet pen ssenarii jaza aluy, tüsırılım men montajdy qadaǧalai aluy jäne ärine kölıkterdı jaqsy tüsıne bıluı kerek.
BÄRI QALAI BASTALDY?
- Oljas myrza, özıŋız turaly aita ketseŋız. Qai öŋırdıŋ tumasysyz, qaida oqydyŋyz? - Men Almaty oblysyndaǧy Qoǧaly auylynda düniege keldım. Almatyda östım, 13-şı orta mektebın aiaqtap, QazŪU-dıŋ jurnalistika fakultetıne tüstım. Bırınşı kursta “Qazaqstan” Ūlttyq telearnasynda täjıribe jinap, artynşa “Almaty” telearnasynda avtorlyq baǧdarlama jürgızdım. - Avtomobilderge degen qyzyǧuşylyǧyŋyzdy ne oiatty? Kışkentaidan kölıkterdı jaqsy köretın ba edıŋız? - İä, mektep qabyrǧasynda kölıkke qyzyǧyp sabaq kezınde sporttyq kölıkterdıŋ dizainyn syzyp otyratynmyn. 2010-2013 jyldary Reseide avtobloging qatty damydy. Qazaq avtojurnalistikasynyŋ negızın qalap bırınşı avtor atanǧym keldı. Oidaǧyny ıske asyrdym.«ÖZIMDI AVTOBLOGER DEP ATAǦYM KELMEIDI»
- Avtobloging turaly ideia qaidan tudy? Blogerlık jolyŋyz jaily aita ketseŋız. Qaşan, qalai bastaldy? - Özımdı avtobloger dep ataǧym kelmeidı. Jurnalistık bılımım bar. 2017 jyly Qaskeleŋdegı “Barys” avtobazarynyŋ Iýtub kanalyn jürgızuge ūsynys tüskende quana qabyldap, ılgerı jyljydym. Jarty jylda 100 myŋ jazyluşy jinap tez arada tanymal boldym. Artynşa “Kolesa” kompaniiasynan jūmysqa şaqyrtu aldym. Būl jerde Qazaqstandaǧy eŋ myqty, aqyldy, talantty kısıler jūmys ısteidı. Komandalyq jūmys aiasynda talantty bılımmen küşeitıp eldegı top kontenttı şyǧardyq. - Qazaqstan üşın atalmyş kontent türı ötımdı me? Halyq qalai qabyldaidy? Qaralym jaǧy qalai? - “Atqa mınıp ösken” qazaq qaşanda jyljymaly tehnikaǧa qyzyǧady. Avtomobil haqynda sapaly kontentke zäru bolǧan auditoriia menı quana qabyldady, qoldady. “Kolesa” kompaniiasynda, mınekei, alty jyl qatarynan üzdıksız video jariialap jatyrmyz. Qazaqqa öte qyzyq modelder turaly aitqanda qaralym öte jaqsy. Arasynda ekskliuzivtı, beitanys kölıkter jaiynda reportaj jasaǧanda qaralym azdau. Degenmen, tehnikany süietın adam özıne keregın alady. Eŋ bastysy, jūmysty tiianaqty, şyn köŋılmen äzırlegendıkten körermen laiyqty baǧasyn berıp otyr. - Qazırgı uaqytta naryqtaǧy eŋ üzdık üş avtokölıktı atai alasyz ba jäne nelıkten? - Üzdık üş kölıktı atau qiyn. Būl süiıktı muzyka, taŋǧaldyratyn film sekıldı auyspaly dünie. Özıŋız şolu jasaǧan top-chartyŋyz qandai deseŋız: Tesla Cibertrack, Ferrari F8, Mercedes-AMG G63«ELEKTR ENERGİIаSYMEN JÜRETIN KÖLIK OIYNŞYQ SEKILDI»
- Elektromobilder men gibridtı avtokölıkter turaly oiyŋyz qandai? - Elektrifikasiia bükıl älemde qarqyn aldy. Būǧan dümpu bergen İlon Mask pen Qytai öndırısı. Qazaqtar üşın tek qana elektr energiiasymen jüretın kölık oiynşyq sekıldı. Benzin sudan arzan memlekette dästürlı motor ekınşı orynǧa jyljymaidy. Gibrid qondyrǧysy bar avtomobilder bölek äŋgıme. Bızdıŋ halyqqa yŋǧaily avtomobil osy. Tehnologiialy häm ünemdı. - Aldaǧy uaqytta halyqqa qandai jaŋa jobalar ūsynasyz? Qandai tyŋ ideialar bar? - Rasyn aitaiyn, äzırşe josparlanǧan proektılerdı ıske asyrumen jürmız. Keleşekte ne bolaryn bılmeimın. Osy mäselege bailanysty köp oilanam, köp tolǧanam… - Jauabyŋyzǧa raqmet!Dina Litpin
«Adyrna» ūlttyq portaly
