Keşe Memleket basşysy Qasym-Jomart Toqaevtyŋ qatysuymen mūǧalımderdıŋ jyl saiynǧy dästürlı Tamyz keŋesı öttı. Jiynda prezident aǧylşyn tılın 2-3, tıptı 5 synyptan bastap oqytu turaly ūsynys aitty. Şyn mänısınde balaǧa aǧylşyn tılın qai synyptan bastap üiretken jön? Sondai-aq biylǧy keŋestıŋ qandai erekşelıkterı boldy? Prezidenttıŋ aǧylşyn tılıne bailanysty ūsynysy köpşılıktıŋ qoldauyna ie bolyp, qyzu talqylanuda. Azamattardyŋ basym bölıgı aǧylşyn tılın 5 synyptan bastap oqytqan jön degen pıkırde. Äitse de, «QazBilim» ortalyǧynyŋ direktory Aiatjan Ahmetjan köpşılıktıŋ būl pıkırımen kelıspeidı. – Memleket basşysy Qasym-Jomart Toqaev «aǧylşyn tılın 3 nemese 5 synyptan bastap oqytaiyq» dep öte oryndy ūsynys jasady. Sebebı 1 synyptan balanyŋ basyn qatyrmai, şet tılın 10 jastan bastap oqytqan jön. Äitse de äleumettık jelıdegı azamattar aǧylşyn tılın 5 synyptan bastap oqytu kerek dep jatyr. Menıŋ oiymşa, aǧylşyn tılı 5 synyptan emes, 3 synyptan bastap oqytyla bastauy kerek. Eger bız aǧylşyn tılın 5 synyptan bastap oqytatyn bolsaq, mekteptegı orys tılınıŋ yqpalyn saqtap qalatyn bolamyz. Sondyqtan da bız aǧylşyn tılı men orys tılın 3 synyptan bastap qatar oqytqan jön. Tıptı orys tılın 5 synyptan bastap oqytsaq ta köşten qūr qalmaimyz. Jalpy qazaq balasy üşın orys tılı köp tılderdıŋ bırı sekıldı şet tılı boluy kerek. Al aǧylşyn tılın bala 10 jasqa tolǧan 3 synyptan bastaǧan jön, – dedı ūstaz. Būǧan deiın ziialy qauym ökılderı «Japondar şet tılın 12 jastan bastap oqytady eken. Sondyqtan da bız de aǧylşyn tılın 5 synyptan bastap oqytuymyz kerek» dep aityp kelgen bolatyn. Alaida būl ūstanym qazırgı taŋda zaman talabyna sai emes sekıldı. Sebebı bügınde iutub arnasy arqyly 4-5 jasar balalar aǧylşyn tılınde üirene bastady. Mıne osyndai balalarǧa aǧylşyn tılın 5 synypqa deiın küttırıp, oqytpai qoiu orynsyz sekıldı. Ärine būl mäselenı sala mamandary aldaǧy uaqytta talqylai jatar. Bıraq zaman talabynyŋ özgerıp jatqanyn moiyndaǧan jön. Aǧylşyn tılınen basqa Tamyz keŋesınde qandai eleulı jaŋalyq boldy. Aiatjan Ahmetjannyŋ aituynşa, biylǧy kelelı keŋestıŋ eŋ basty erekşelıgı – jiynǧa Qasym-Jomart Toqaevtyŋ qatysuy bolǧan. – Bırınşıden, prezidenttıŋ Tamyz keŋesıne arnaiy kelıp, qatysuy ūstazdarǧa degen qūrmet dep bılemın. Mūny öz basym zor rizaşylyqpen qabyldadym. Sondai-aq, jiynda ministr 2021 jyldan bastap Älıppenıŋ 1 synypqa engızıletının mälımdedı. Eŋ bastysy ol atalǧan oqulyqtyŋ Ahmet Baitūrsynūlynyŋ Älıppesınıŋ negızınde daiyndalatynyn aitty. Būl ärine köpten berı synnan köz aşpaǧan ministrlıktıŋ «Bärekeldı» dep maqtaityn äreketı. Üşınşıden, ministrdıŋ oqulyqtardyŋ qatesız basyluyna män berıp, baspalardyŋ bassyzdyǧyna küres aşyp otyrǧanyn joǧary baǧalaimyn. Şyny kerek keŋeste köpşılıktıŋ köŋılınen şyǧatyn köptegen mäseleler köterıldı. Äitse de, öz basym jiynda aitylǧan tättı sözder naqty ıske asa ma, joq pa degenge alaŋdap otyr. Bızdıŋ elde jaqsy ideialar aitylǧanmen onyŋ ıs jüzıne asuy qiynnyŋ qiyny emes pe? Jalpy jas ministrdıŋ myqty qoldauşysy bolmasa baspalardyŋ barmaq basty, köz qysty äreketıne tötep bere almauy mümkın , – deidı Aiatjan Ahmetjan. Soŋǧy jyldary Bılım jäne ǧylym ministrlıgı synnan köz aşpai keledı. Jas ärı su jaŋa ministr Ashat Aimaǧanbetov saladaǧy kemşılıkterdı tüzei ala ma? Jalpy Tamyz keŋesınde prezident te, ministrde qoǧamnyŋ talap tılegıne qūlaq asatynyn aŋǧartty.
Serǧali Aslanbek
"Adyrna" ūlttyq portaly
