16 qyrküiek künı "Adyrna" ūlttyq portalynda "Jaŋaqorǧandyqtar 3 mln teŋgege juyq qarjyǧa memlekettık tu satyp almaq" degen taqyryppen maqala jariialaǧan bolatyn. Sol materialǧa Jaŋaqorǧan audanynyŋ qoǧamdyq damu bölımı resmi jauap berdı, dep habarlaidy «Adyrna» tılşısı.
Atalǧan maqalada Qyzylorda oblysynyŋ Jaŋaqorǧan audanynyŋ qoǧamdyq damu bölımı 2 677 457 teŋgege memlekettık tu satyp aluǧa tender jariialaǧany, jaŋaqorǧandyqtar kölemı 1h2 metr - 413 dana, kölemı 1,5h3 metr - 4 dana, kölemı 2h4 metr - 4 dana, barlyǧy 421 dana memlekettık tudy satyp alǧaly otyrǧany, är tudyŋ baǧasy 6 myŋ teŋgeden säl ǧana asatyny, t.b jailar söz bolǧan-dy. Sondai-aq bız öz tarapymyzdan tiıstı mekemege "Jaŋaqorǧan audanynyŋ qoǧamdyq damu bölımıne 421 dana memlekettık tu ne üşın qajet bolyp otyr?" "Qazaqstan jūrtşylyǧy alda, 25 qazanda Respublika künın, 16 jeltoqsanda Täuelsızdık merekesın toilady. Al ol merekelerge osynşama köp tudyŋ qajettılıgı bar ma?" degen saualdar joldaǧan edık.
Jaŋaqorǧan audanynyŋ qoǧamdyq damu bölımı resmi jauabynda:
“Qaiyrly kün, qūrmettı oqyrmandar! Atalǧan mäselege bailanysty Jaŋaqorǧan audanynyŋ qoǧamdyq damu bölımı kelesını habarlaidy. "Adyrna" aqparattyq agenttıgınıŋ saitynda atap körsetılgen (2 677 457 teŋge) qarjyǧa Jaŋaqorǧan audany äkımdıgıne qarasty 26 kent, auyldyq okrugterınıŋ äkımı apparaty, 15 memlekettık mekemeler men 25 kent, auyldyq klub üilerı syrtqy (184 Eltaŋba, 421 tu) Memlekettık Rämızdermen qamtamassyz etu közdelgen. Memlekettık mekemeler syrtqy rämızdermen jylyna bır ret bır ortalyqtan "Jaŋaqorǧan audanynyŋ qoǧamdyq damu bölımı" KMM-sı arqyly qamtamasyz etıledı" delıngen.
Qoş! Resmi jauapta körsetılgen memlekettık mekemelerdıŋ sany 66-dan aspai tūr.
Audandaǧy mektep, auruhana, zaŋ mekemelerı, t.b qosqannyŋ özınde bır audanda 421 memlekettık mekemenıŋ boluy äste mümkın emes. Sonda audan 2 677 457 teŋgege satyp alǧaly otyrǧan 421 tudy ne ıstemek?
Asyl Abai "Adyrna" ūlttyq portaly
