Äleumettık jelıde qalyŋ maldy talqylaǧan äieldıŋ sözı pıkırtalas tudyrdy, dep habarlaidy “Adyrna” ūlttyq portaly.
Güljan esımdı TıkTok qoldanuşysy qazaq qyzdarynyŋ qalyŋmalyn 10 mln teŋgege köteru kerek dep sanaitynyn aitty. Onyŋ sözınşe, qyzdardyŋ qūny Toyota Camry kölıgınen de tüsıp ketken.
“Qazaqtarǧa qalyŋmaldyŋ baǧasyn 10 millionǧa köteru kerek. Nege deisız ǧoi? Sebebı qazır qazaq qyzdarynyŋ qūny «Kamriden» de tüsıp kettı. 1-1,5 mln berıp qūtyla salady. Men oǧan öte qarsymyn. Būl jerde saudalasyp nemese qyzdy satyp jatqan joqpyn. Būl jerde qazaq qyzynyŋ, özımızdıŋ salt-dästürımızdıŋ qūndylyǧyn qaitadan jaŋǧyrtyp, köteru kerek dep oilaimyn”, - deidı belsendı.Äiel adam qalyŋmaldyŋ az boluy ajyrasudyŋ beleŋ aluyna sebepşı bolyp jatqanyn aitady.
“Mysalǧa, türıkterde qyz alu üşın pälenbei kelı altyn beredı. Bıraq ol jaqta ajyrasu degen joq. Al bız bükıl düniejüzı boiynşa ajyrasu jaǧynan şamamen bırınşı oryndy alyp tūr ekenbız. Sebebı osyndai qūnsyzdanu kesırınen sondai dünieler bolady. Eger de bız bır qyzdy alu üşın 10 mln beretın bolsaq, ekı jaqtyŋ da bır-bırıne degen qarym-qatynasy basqaşa, qyz balanyŋ aldynda jıgıttıŋ deŋgeiı, abyroiy joǧary bolady”, - deidı ol.Alaida jelı qoldanuşylarynyŋ keibırı pıkırmen kelıspeitının aitty. “Qyz ajyrasamyn dese qalyŋ mal alǧany esınen şyǧyp ketedı”, “sonda ne özgeredı?”, “qalyŋsyz-aq baqytty bolyp jatqandar köp”, “sol 1 millionnyŋ özın kreditke alatyndar bar”, “qazır qyzdar qalyŋ maldan bölek qymbat mahr sūraidy” dep jarysa jazuda. Al endıgı bırı “qalyŋ malǧa dünie alady, ol jıgıtke barady”, “bersın, dūrys”, “ol bızdıŋ dästür, qanşa berse de jarasady”, “qyzdyŋ qūnyn köteru kerek, oryndy” degen pıkır qaldyryp jatyr.
Ūqsas jaŋalyqtar
