Futboldan Qazaqstan qūramasynyŋ bas bapkerı Stanislav Cherchesov qazaq tılınde sūraq qoiǧan jurnalistı mazaq qyldy, dep habarlaidy «Adyrna» tılşısı.
Keleŋsız jaǧdai Sloveniiamen ötken machtan keiıngı baspasöz konferensiiasynda boldy. Bas bapker özıne qazaqşa sūraq qoiǧan tılşınıŋ sūraǧyna kelemejdep jauap qatty.
«Sen qazır fransuz tılınde söilep tūrsyŋ ba?»–dedı ol jurnalistıŋ sözın bölıp. Keiın basyn izep, sūraǧyn jalǧastyruǧa bolatynyn aŋǧartty.
Eske salaiyq, būǧan deiın Stanislav Cherchesov Astanada ötken baspasöz mäjılısınde qazaqşa sūraq qoiylǧanyna şaǧymdanǧan edı.
«Nege orysşa qoimaisyz? Men qazır sızge öz ana tılım osetin tılınde jauap bersem ne bolady? Bıraq ol kezde eşkım tüsınbeidı. Osynyŋ aldynda qazaqşa saualyŋyzdy federasiia prezidentı audaryp berdı, endı ol kısını qaita-qaita äurelemeimın ǧoi»,—dep narazylyq bıldırdı bas bapker.
Keiın tıl belsendılerı Cherchesovtıŋ qazaqşa üirenıp, tıl syndyryp jatqany jaiynda mälımet taratqan.
