Abai oblysynyŋ Ürjar audanyndaǧy Ürjar auylynda 2001 jyly tuǧan jas jıgıttıŋ kısı qolynan qaza tapqany anyqtaldy.
2024 jyldyŋ 30 qaŋtarynda Abai oblysynda Raibek Rahat esımdı er adam asa qatygezdıkpen öltırılgen.
Aqparatty BAQ–qa jetkızgen jıgıttıŋ tuǧan äpkesı – Äsem.
«2001 jyly tuǧan bauyrym asa jauyzdyqpen, qataldyqpen öltırıldı. Oǧan 22 pyşaq jaraqaty salynǧan!!! 29.01.24 künı äskeri komissariatta Urdjar audandyq qorǧanys ısterı basqarmasynyŋ (ODO) 6-ǧa juyq qyzmetkerınıŋ qatysuymen kısı ölımı oryn aldy», - delıngen Äsemnıŋ jelıde jariialaǧan habarlamasynda.
Äsemgül Qanatqyzy «Adyrna» tılşısıne bergen sūhbatynda oqiǧanyŋ män- jaiyn aitty.
- Qaiǧyly tragediia oryn alǧan kün esıŋızde me?
- İä, ınımnıŋ denesınıŋ sau jerı bolmady. Oǧan 22 jerınen pyşaq jaraqatyn salyp, asa qatygezdıkpen öltırgen. Qaiǧyly oqiǧa memlekettık qūpiialardy saqtaityn rejimdık nysan bolyp tabylatyn jerde bolǧan. Spirttık ışımdıktermen dastarhan jaiylyp, ınımnıŋ ärıptesterı arasynda kışıgırım otyrys bolǧan. Alaida otyrys barysynda janjal tuyp, keiınnen ǧimarattyŋ syrtynda ınımdı öltırgen.
- Tergeu barysy qalai jürıp jatyr? Kınälıler tergelıp jatyr ma?
- Tergeu 7 ai boiy jürgızıldı, bıraq älı künge deiın menıŋ bauyrymnyŋ öltırıluıne qatysy barlarǧa qatysty ädıldık pen jazany talap ete almai otyrmyz. Tergeu barysynda bızdıŋ oiymyzşa, zaŋ būzuşylyqtar oryn alǧan. Kınälı tek bır adam retınde tanyldy. Bıraq äskeri komissariat qyzmetkerlerı jasyrynyp tūr! Tergeude köptegen sätter eskerılmei qaldy! Qylmys pyşaqpen jasalǧan. Alaida qylmystyŋ ızderı tekserılmedı, Beine jazbalardaǧy beineler alynbaǧan. Köptegen küdıktılerdı jasyru boiynşa ıs qozǧalmady. Polisei qyzmetkerı abaisyzda menıŋ bauyrymnyŋ mäiıtı tabylǧan jerdegı foto men videony WhatsApp qosymşasynda taratqan. Būl öte sūmdyq!
Asqan qatygezdıkpen öltırılgen er adam audandyq komissariatta jūmys ıstegen. Marqūm bolǧan jıgıt nebärı 10 kün jūmys ıstep ülgergen.
- Ol (marqūm) äskeri komissariatta jūmysqa 10 kün būryn kırgen. Ol äskeri kafedrany bıtırgen. Mamandyǧy - tehnolog," - deidı marqūmnyŋ äpkesı.
Sondai-aq, marqūm Rahattyŋ äpkesı qylmystyq ıske qatysty sot otyrysy bırneşe ret keiınge şegerılgenın habarlady.
Mūnyŋ sebebın sūrap, ıske qatysty Abai oblysy Semei qalalyq audanarylyq sotyna sūrau saldyq. Resmi organ üş jūmys künı ışınde jauap joldaitynyn habarlady. Bügın üşınşı kün, äzırge jauap joq.
Symbat Nauhan
«Adyrna» ūlttyq portaly
