Jetısu oblysynyŋ auyldarynda Respublika künı qarsaŋynda 5 jaŋa äleumettık nysan paidalanuǧa berıldı. Olardyŋ ışınde därıgerlık ambulatoriia, auyldyq klub, auyldyq äkımdık, saiabaq jäne basqa da obektıler bar, - dep habarlaidy Jetısu oblysy äkımınıŋ baspasöz qyzmetı.
Mäselen, mereke qarsaŋynda Eskeldı audanynda 2 bırdei nysan paidanaluǧa berıldı. Atap aitqanda, Jalǧyzaǧaş auylynda jaŋa blokty-moduldı auyldyq mädeniet kluby aşylsa, Qaratal auylynda blokty-moduldı auyldyq äkımdık paidalanuǧa berıldı.
Sol siiaqty därıgerlık ambulatoriialar Tekelı qalasynda jäne kürdelı jöndeuden keiın Köksu audanynyŋ Mūqyry auylynda qoldanysqa berıldı.
- Mūqyry auyldan tuyp-östım. Ata-anam da osy auyldyŋ tumasy. Erterekte būl auylda medpunkt bolǧan, sosyn feldşerlık-akuşerlık punkt salyndy, keiın seksenınşı jyldary därıgerlık ambulatoriia tūrǧyzyldy. Soŋǧy jyldarda ǧimarattyŋ ışı suyq, jöndeudı qajet etetın. Mereke qarsaŋynda jaŋaryp, jaŋǧyrtylǧan nysandy qoldanysqa berıp otyr. Qan qysymy joǧary bolǧandyqtan ambulatoriiada esepte tūramyn. Därıgerlerımız bılıktı, eseptegı pasient retınde därılerımızdı tegın, uaqytyly alyp tūramyz, - deidı mūqyrylyq tūrǧyn Jūmadıl Joldybaev.Atap ötsek, Mūqyry auylynda 3,5 myŋ adam tūrady, sondyqtan mūndaǧy medisinalyq nysandy jaŋartyp, qyzmet körsetu sapasyn arttyrudyŋ maŋyzy zor. Densaulyq saqtau infraqūrylymyn jaŋǧyrtumen qatar kadrlyq mäseleler de şeşımın tabuda.
- Medisinalyq joǧary oqu ornyn bıtırgenıme bır jol boldy. Auylǧa jūmys ısteuge keldım, oǧan eş ökınbeimın. Adamdarǧa barynşa käsıbi kömektesuge tyrysamyn. Būl jaŋarǧan ambulatoriiada sapaly medisinalyq qyzmet körsetuge barlyq jaǧdai jasalǧan, barlyq qajettı qūral-jabdyqtar bar. Auyldastaryma därıgerlık kömegım tietınıne quanyştymyn, - deidı jas maman, jalpy täjıribe därıgerı Arailym Şahanbekova.Sonymen qatar mereke qarsaŋynda Qaratal, Köksu, Panfilov audandarynda jalpy sany 70 otbasy jeke üilerge ie boldy. Atap aitqanda, Köksu audany Jarlyözek jäne Balpyq bi auyldarynda 17 üidıŋ, Qaratal audany Üştöbe qalasynda 23 üidıŋ, Panfilov audanynyŋ Jarkent qalasynda ekı päterlı 15 üidıŋ kıltı tapsyryldy.
- Köp balaly retınde kezekte tūrǧanmyn. Biyl kezegımız kelıp, üilı bolyp jatyrmyz. Bes balam bar, ülkenı on jasta, kışısı bır jarym jasta. Küieuım Kerbūlaq audanyndaǧy sement zauytynda jūmys ısteidı. Özım bala kütımımen üide otyrmyn. Balalarmen päterden päterge köşıp jüru qarjylyq jaǧynan da, moraldyq jaǧynan qiyn boldy. Endı üilı bolyp, qonystoi quanyşyna jettık. Üiımız ūnady, keŋ, jaryq, jyly, balalarymnyŋ nesıbesı ǧoi, - deidı jaŋa qonys iesı, Jarlyözek auylynyŋ tūrǧyny Ruqiia Raiym.
Jetısu oblysy äkımınıŋ baspasöz qyzmetı.
