Bız jalpy elıktegış halyqpyz. Äiteuır jūrttykı özımızdıkınen artyq körınıp tūrady.
Jūrttyŋ balasy tılalǧyş, körşınıŋ küieu mal tapqyş, basqanyŋ äielı pysyq, şeteldıŋ kiımı jaqsy, körşı eldıŋ azyq-tülıgı sapaly, öz tılımızdegı mektepter naşar bılım beredı, balamyz özge tılde bılım alsa, myqty, jan-jaqty bolady... Aita bersek, köp endı...
"Oibui, ana japondar degen keremet eken, balalaryn titteiınen eŋbekke üiretedı, sodan būlardyŋ tärbiesı keremet, özı bai el eken!", -deimız!
"Ana AQŞ degende artyq su aǧyzbaidy, jaryq jaqpaidy, ünemşıldıgı sūmdyq eken endı",-deimız.
Taǧy bır eldı "köşelerı tap-taza, bır qoqys joq, eldıŋ ükımetı qandai tamaşa!" deimız.
Keşı bır tılge qatysty postyma: "oi, tıldıŋ jaǧdaiy sol, bız qazaq bolmaimyz",- dep jazypty.
Sonda osynyŋ barlyǧyn ärqaisymyz özımızden, öz otbasymyzdan bastau kerektıgın ūmytamyz.
Äiteuır bärın "bıreu bastau kerek, bıreu jasap beru kereu, tek özımız emes"...
Qazaqtyŋ da tärbiesı ünemşıldıkke, ysyrapşyldyqqa jol bermegen, eŋbekqorlyqqa üiretıp, jastaiynan tärbielegen.
Qazaqtyŋ är maqalyn künıne bır oqyp qoiyŋyzşy, ärqaisynyŋ astarynda ūşan-teŋız tärbie jatyr!
Mäselen, "Sudyŋ da sūrauy bar" degendı aitamyz, sonyŋ maǧynasyna nazar audaramyz ba?
Mıne, ünemdeuge üiretu, ysyrapşyldyqqa jol bermeu!
Balany eŋbekpen tärbieleuge qatysty da köptegen naqyldar bar.
Qazaǧym är ısıne, qimylyna maqal-mätel, naqyl söz şyǧaryp qoiǧandai, tereŋıne boila da, ūrpaǧyŋnyŋ tärbiesıne paidalana ber! Sonda japonǧa da, Ämerikaǧa da,basqa da qyzyqpaisyŋ.
Özbekter tälım-tärbiege myqty, şeşender qyzdarynyŋ tärbiesıne jaqsy deimız, qyzyǧymyz.
Qazaqtyŋ tärbiesı eşkımnen kem bolmaǧan, tıptı kezınde talai jihankezder, patşalar taŋqalǧan eken.
Qazaq eşqaşan jetımın jylatpaǧan, jesırın jıbermegen, bailary kedei-kepşık auyldastaryna, rulastaryna qarailasqan.
Jetımder üiı, ajyrasu degen "körıŋde ökırgır" keŋes ükımetımen kelgen dert.
Endı kep, "Japoniiada solai eken" dep, Japoniiaǧa taŋǧalamyz. Özbek salt-dästürge berık dep tamsanamyz.
Revoliusiiaǧa deiın bızdıŋ salt-dästür, ädet-ǧūrpymyzǧa taŋǧalǧan zertteuşılerdıŋ pıkırlerı -QAZAQTYŊ ŪLY HALYQ bolǧanynyŋ dälelı!
Basqaǧa qarap taŋǧalmai, boiymyzdaǧy, qanymyzdaǧy tegımızdegı asyl qasietterdı oiatuymyz kerek.
Özgenıkın "Keremet!" dep tamsana bergenşe, NAǦYZ QAZAQ ärqaisymyz özımızden bastaiyq, erınbei, qaǧaz-qūjatty auystyru jūmysynan qaşpai, tegımızdı qazaqşalaiyq, balamyzdy tek qazaqşa oqytaiyq, eŋbekqorlyqqa, ünemşıldıkke, ekotazalyqqa üireteiık!
Özımız köşege qolymyzdaǧy qoqysty tastap, qaqyryp-tükırıp jürıp, "mynany, äkımder nege qaramaidy,ä!" dep jürıp,bala tügılı özımızdı-özımız tärbielei almaimyz.
Jaǧylyp qalǧan jaryq bolsa, söndır, şaşylyp jatqan närse bolsa, jina, şaşyp jatsa, ait, sonda ūl-qyzyŋyz qarap boi tüzeidı.
Tegıŋdı qazaqşala, "ov, ovadan,ovich, ovnadan qūtyl. Qyzmettı, bankomatty qazaqşa qoldan.
"Balaŋdy qazaqşa oqytpa" dep saǧan ükımet aityp jatqan joq ǧoi!
Qazaqtar balalaryn jappai qazaqşaǧa berse, orys mektebıne sūranys azaiyp, öz-özınen jabylady.
Sonda özge elge qyzyqpai, özımızdıkımen maqtanatyn bolamyz!
Al mūnyŋ bärı ata-babamyz mūraǧa tastap ketken tärbiede bar!
Qyzdarymyz qylyqty, ūldarymyz namysty bolsyn, ajyrasu bolmasyn, jetımder jylamasyn desek, ūlttyq tärbienı qolǧa alu kerek!
"Ūltymyz ūlt bolyp qalsyn" desek, besıgımızdı tüzeiık!
Basqa jol joq!
Tūrar SÄTTARQYZY
"Adyrna" ūlttyq portaly
