Bügın — qazaqstandyq tanymal jazuşy, synşy, ädebiet zertteuşısı Gerold Belgerdıŋ tuǧanyna 90 jyl tolyp otyr, dep habarlaidy «Adyrna» tılşısı.
Gerold Belger 1934 jyly 28 qazanda Saratov oblysy Engels qalasynyŋ Edıl nemısterı otbasynda düniege kelgen. 1941 jyly onyŋ nemıs otbasy Qazaqstanǧa, Esıl boiyndaǧy qazaq auylyna jer audarylǧan. Ol qazaq orta mektebınde oqyp, 1958 jyly Abai atyndaǧy Qazaq pedagogikalyq institutynyŋ ädebiet fakultetın bıtırgen.
Qalamger eŋbek jolyn 1953 jyly laborant bolyp bastap, keiın orta mektepte mūǧalım, 1963 jyly «Jūldyz» jurnalynyŋ ädebi qyzmetkerı, 1989 jyly nemıs ūlttyq mädeni ortalyǧynyŋ töraǧasy, 1995 jyly nemıs tılındegı «Feniks» almanahynyŋ bas redaktory boldy. 1994-1995 jyldary Pavlodar oblysynan Joǧarǧy Keŋestıŋ deputaty, Almaty qalasy nemıs mädeni qoǧamynyŋ töraǧasy qyzmetın atqardy. Är jyldary Qazaqstan nemısterı keŋesınıŋ, QR Prezidentı janyndaǧy Memlekettık saiasat jönındegı Ūlttyq keŋestıŋ, QR-nyŋ IýNESKO ısterı jönındegı ūlttyq komissiianyŋ müşesı, bırqatar ädebi jurnaldardyŋ redaksiialyq alqa müşesı boldy.
Ūlty nemıs, jüregı qazaq jazuşy B. Mailin, Ǧ. Müsırepov, Ä. Nūrpeiısovtıŋ jäne taǧy basqa qazaq jazuşylarynyŋ şyǧarmalaryn orys tılıne audarǧan bolatyn. Özı de ädebiet älemıne nemıs, qazaq, orys tılderınde 70 juyq kıtabyn, 2000 myŋnan asa maqalasyn amanat ettı.
Gerold Belger halyq esınde ötkır pıkırlerımen qaldy. Ol bilıktıŋ aldynda qūrdai jorǧalaityndardy qataŋ synǧa alǧan edı. «Bızdegı jazuşylardyŋ, kerısınşe, bilıktıŋ aldynda qūrdai jorǧalap, qūldyq ūratynyn talai körıp jürmın. Tıptı, solardyŋ köbısı menıŋ aralasyp jürgen dostarym. Köşede jürgende olar basqaşa söileidı de, bilıktıŋ aldyna barǧanda mülde bölek sairaidy. Ziialy qauymnyŋ osy bır mınezı menıŋ köŋılımnen şyqpaidy»,—dedı ol. Sondai-aq jazuşy amalsyzdan deputat bolǧanyn mälımdegen bolatyn. «Şyny kerek, deputat bolǧym kelgen joq. Nūrsūltan Nazarbaev qoiǧannan keiın amalsyz boldyq qoi, taratyp jıbergende «şyǧarmaşylyǧymmen erkın ainalysatyn boldym ǧoi» dep qatty quandym»,—dep tüsındırdı qairatker «Jūldyzdar otbasy» jurnalyna bergen sūhbatynda.Qazaqstannyŋ belgılı jazuşysy Gerold Belger 80 jasynda jürek auruynan qaitys boldy,
