Qazaqta ülkenge iılıp sälem salu arqyly aq bata, jaqsy söz estitın kelınnıŋ baǧy artady dep jatady. Al kelın sälem salmai jatsa, äjeler tıptı "tızeŋ synsyn" dep aitatyn bolǧan. Bıraq belgılı bır jaǧdaiǧa bailanysty kezınde kelınder sälem saludan bosatylǧan eken. Būl turaly Tengrinews.kz tılşısıne tarihşy Jūldyz Ormanova aitty. Onyŋ aituynşa, kelınnıŋ ata-enesı men qaiyn jūrtyna degen qūrmetın bıldıretın būl dästür öte qataŋ saqtalyp kelse, keibır jaǧdailarda kelınderge ol dästürdı oryndamauǧa bolady. "Qazaqta kelınge qatysty salt-dästürler men olarǧa jükteletın mındetter öte köp. Degenmen, tarihqa üŋılsek, kelın aiaǧy auyr bolǧan kezde sälem salu mındetınen bosatylǧan. Jüktı kelındı bolaşaq ana retınde sanap, kerısınşe, oǧan qūrmet bıldırıp, asty-üstıne tüsken. Al bıraq qazır, şyny kerek, kelınder jüktılıgınıŋ soŋǧy aiynda bolsa da ūiat dep, sälemın salyp jatady. Salt-dästürdı qūrmettegenı de dūrys şyǧar", - deidı tarihşy. Sondai-aq, ol küieuı qaitys bolǧan jaǧdaida kelınnıŋ sälem saludan bosatylatynyn aitady. "Küieuı qaitys bolǧan jaǧdaida kelın sälem saludan bırjola bosatylǧan. Joldasynan aiyrylǧan kelındı jūbatyp, barynşa qamqorşylyq körsetken. Köbı jesır äiel cälem saluy kerek pe, salmauy kerek pe dep sūrap jatady. Bıraq saltymyz boiynşa kelınder mūndai qaiǧyly jaǧdaida sälem saludan bosatyluy tiıs. Onyŋ eş aiyby joq, qūrmetsızdık tanytty dep aiyptauǧa bolmaidy. Küieuı qaitys bolǧan jesır äielge jylyn bergenşe, bır jyl boiy sälem salmauǧa rūqsat etıledı", - deidı tarihşy. Būdan bölek Ormanova kelınder törkınderıne sälem salmaidy deidı. Aituynşa, qazaq kelını tek qaiyn jūrtqa iılıp, sälem beruı tiıs. Tarihi mälımetterge süiensek, sälem salu dästürı tek türkı halyqtaryna emes, sonymen qatar, Europa halyqtaryna da ortaq. Eŋ qyzyǧy Ūlybritaniiadaǧy, Angliiadaǧy koroldık otbasylarynda kelınder älı künge deiın sälem salady. Onyŋ sözınşe, qazaq kelınderı qalai sälem salsa, sol siiaqty Angliianyŋ koroldık otbasylaryndaǧy kelınder de solai sälem salady eken.
"Adyrna" ūlttyq portaly
