«Bolǧanynan bolmaǧany jaqsy». Äkım reitingke bailanysty pıkır bıldırdı

Abai oblysynyŋ äkımı Nūrlan Ūranhaev oblys äkımderınıŋ reitingıne qatysy joq ekenın aitty, dep habarlaidy «Adyrna» tılşısı. Ortalyq kommunikasiialar alaŋyndaǧy jiynda «Juyrda 17 oblys pen üş megapolistıŋ äkımderınıŋ reitingısı şyqty. Atalǧan reitingte sız bırınşı orynda köş bastap tūr ekensız. Jalpy mūndai reitingter «Arnaiy tapsyryspen jasalady» degen boljam aitylady. Reiting boiynşa bırınşı oryn aluyŋyz arnaiy tapsyrys emes pe? Jalpy özıŋızdı üzdık äkım dep esepteisız be?» dep äkımge sūraq qoiyldy. Nūrlan Telmanūly özın üzdık äkım sanamaitynyn eskerttı. «Men üşın mūndai reitingtıŋ bolǧanynan bolmaǧany jaqsy. Sebebı osyndai sūraqtar tuyndamaidy. Men eşqaşan özımdı de, basqa ärıptesterımdı de menen jaqsy nemese kem dep oilamaimyn. Öitkenı bız osy reiting üşın jūmys jasamaimyz, kım ne dese halyqtyŋ baǧasy eŋ maŋyzdy. Şäkärımnıŋ «Mansaptyŋ taǧy üşın, maqtanǧa salynǧannan aulaqpyn» degen dana sözı bar. Şynyn aituym kerek, osy lauazymda jürmın, barmyn. Menımen qatar, teŋ jürgen ärıptesterımnen men artyqpyn degen jūmysqa barmadym jäne barmaimyn da. Reiting turaly baspasöz hatşymnan «Mynau qaidan şyǧyp jatyr, kım ony jasap jatyr?» dep bırneşe ret sūraǧanmyn. Men mūndai reitingterdı bılmeimın. Erteŋ däl osyndai reiting şyǧatyn bolsa, men oǧan da qaramaimyn. Men özımdı bırınşı dep eseptemeimın», – dedı oblys äkımı.