Mäjılıs deputaty Azat Peruaşev memlekettık qyzmetkerlerdıŋ eskı Qazaqstannyŋ aktivterın qaitaru aiasynda menşık bölısudı jäne biznestı reiderlık jolmen tartyp alu tendensiiasynyŋ küşeigenın mälımdedı. Deputat osy mäsele boiynşa Bas prokuratura men premer-ministrge resmi sūrau joldady, dep habarlaidy "Adyrna" ūlttyq portaly.
Peruaşevtıŋ aituynşa, partiiaǧa ärtürlı salada qyzmet atqaratyn käsıpkerlerden memlekettık qyzmetkerlerdıŋ öz ökılettıkterın menşık bölısu jäne biznestı reiderlık jolmen basyp alu üşın paidalanu tendensiiasy jönınde habarlamalar tüsude.
"Türkıstan oblysy Saryaǧaş audanynyŋ äkımdıgı Bolat Nazarbaevtyŋ mülkın qaitaru syltauymen körşı käsıpkerlerden 2017 jyly Qarjy ministrlıgınıŋ aşyq auksionynan bıryŋǧai lotpen satyp alynǧan sanatorii nysandarynyŋ bır bölıgın tartyp alǧanyn mysal retınde aituǧa bolady. Osyǧan bailanysty sanatorii 2 milliard teŋge kölemınde şyǧynǧa ūşyrady. Osy siiaqty "QTJ" aksionerlık qoǧamy arqyly Pavlodar oblysyndaǧy Atyǧai stansiiasyndaǧy ǧimaratty jäne temırjol joldaryn 2011 jyly salǧan "ANGRENSOR Ltd" JŞS-nen tegın alyp beru üşın sot arqyly mındettedı. Būl obektılerdıŋ qūny 1,5 milliard teŋgeden asady. Osy siiaqty basqa da habarlamalar türlı aimaqtardan kelıp jatyr. Būl – menşık bölısudıŋ tūtas bır täjıribesı qalyptasyp kele jatqanynyŋ belgısı", – dedı deputat öz sūrauynda.Peruaşevtıŋ aituynşa, reiderler keide būl äreketterdı Eskı Qazaqstannyŋ dauly tūlǧalary men oligarhtarymen bailanysty zaŋsyz aktivterdı qaitarumen aqtauǧa tyrysady. "Ak jol" demokratiialyq partiiasy osy baǧytta naqty jūmystardy tolyqtai qoldaidy. Bız 2013 jyldan bastap būl taqyrypta köptegen deputattyq sūraulardy joldadyq jäne tiıstı zaŋdy talqylauǧa belsene qatystyq. Şynynda da, eskı Qazaqstannyŋ zaŋsyz aktivterın qaitaru aiasynda erıktı prosedura qarastyrylǧan. Alaida, joǧaryda atalǧan mysaldardyŋ eşqaisysynda oligarhtar turaly söz bolmaidy. Saryaǧaştaǧy sanatorii jaǧdaiynda marqūm Bolat Nazarbaevtyŋ kompaniiasyna obektıler qaitarylǧan, al adal käsıpkerlerdıŋ zaŋdy türde auksionnan satyp alynǧan mülkı osy syltaumen tärkılengen", - dedı Peruaşev.
