Arlan endı alasūra qaşqan joq, küşıkterı ūzap ketkendı anyq sezgen-dı. Olar öz taǧdyrynyŋ soqpaǧyna tüsıp, basqa ölkege bet alǧan. Olar Otanǧa oralmaq emes. Otau jat üşın, Otan Taq üşın qūrban bolyp ketken... Analary bastaǧan qos börı, qaita-qaita būrylyp arlan-äke qalǧan qyrǧa jaltaqtai bergen. Bıraq ana qasqyr qaiyrylǧan joq. Kımge, nege oralmaq, artta ajal qalyp bara jatqan. İä, ölım sepken myltyqtar ünı endı emıs-emıs estıledı. Sälden soŋ ol dybystar da öştı. Arqanyŋ arlany endı ūzaq tünderde kök tıle ūlymaidy. Eşqaşan. Arlan osy jerdı mekendegelı - mäŋgılık. Onyŋ atasynyŋ atasy būnda aŋ aulaǧan. Türkıler tuyp jatqanda da, ardaqty babalary qarap tūrǧan. Alaşa han saiyn dalada jalǧyz qalyp, şyŋǧyra jylap, ölım özegın örtep jatqanda ana-qasqyr aq sütın auzyna tamyzǧan. Būl dalany sodan soŋ kımder jailamady. Sauyttylar sülderın, qarulylar qaraqan basyn ǧana äketken edı osy aradan. Būlar qaldy. Jyl qūstaryndai jylylyq ızdegen emes. Şıldede şi astyna qaramady, aqpanda apan tübın panalaǧan joq, arystan-mysyq tözbes Arqada būlar ǧana qaldy. Bıraq bärı aiaq asynan özgerdı. Arqa tösıne kölıktı, qaruly, nökerlı top kelıp, qasqyr bıtkendı qyra bastady.
*
Astana audany äkımı ministrlıktegı dosyn bügıngı aŋşylyqqa qoimai, köndırıp şyǧarǧan. - Pälı, sen būl jaqtyn qasqyrlaryn körgen joqsyŋ. Taudai börılerdı köregende şoşyp ketpe, - keŋkıldep küldı äkım.
- E, ne körınıptı, «vinchester» aman bolsyn.
- Qaida, «vinchestermen» ata almaisyŋ, «Kalaşnikov» kerek, «Kalaşnikov»!
Tüske deiın Ereimentauǧa jaqyndaǧan üş djip, közge eşteŋe tüsıre almady. Esesıne aŋşylar ekı märte toqtaǧan kezde dastarhandy mol jazyp, qymbat azyqtaryn qarbyta jegen. Alabūǧa, qazy-qarta, uyldyryq, kolbasa, üiıtılgen tauyq-qaz, özgeşe jarqyraǧan «Henessi» estı ala bastaǧan. Tekila, viski, rom sekıldı tūqymy bölek bötelkeler auqat şetındegı qymyzǧa qol apartpady. Aq kazein torsyqqa qūiylǧan qymyz oqşau, bölek qalǧan sekıldı. «Al kettık» degen kezde qymyz toly qūtylar kereksız qalyp qoidy. - Äne kettı! Jol basyna tört qasqyr, «menı kördıŋbenıŋ» belgısındei şūbatyla şyǧa keldı. - Endı toqtaimyz, - dedı audan äkımı. - Nege? Ministrlıkten kelgen bastyq ortaǧa saual tastady. - Keremettı köresızder, soŋǧy djiptegı itterdı tüsıremız...
Sälden soŋ soŋǧy kölıktıŋ artqy esıgınen bet älpetterı bölek itter tüse bastady. - Mynau - «alabai»! - Mynau- «nemıs ovcharkasy»! - Mynau -«bulterer»! - Mynau -«orystyŋ tazysy»! - Mynau -«aǧylşyn tazysy»! - Pas! İtter dalany tamaşalap tūryp qalǧandai boldy. Tek sälden soŋ börılerge qarai ūmtyldy. Qyr asqan börıler jylystap kettı. Jetkızer türı körınbeidı. Şetel itterı alqynyp qalypty. «Sodyr töbetterdıŋ» jünderı jyǧyluly. - Öi, mynalaryŋnyŋ äuselerı bıtıptı ǧoi, - dep ministrlıkten kelgen jarty bastyq daraqylana küldı. Külu kerek sekıldı, qoldau kerek sekıldı boldy. Qalǧandary tynyş dala ünsızdıgın dal-dal jyrtty. Börıler aiazdy künı özgeşe qūlpyra jortyp, japon men nemıster jasaǧan djipterge küle qaraǧandai. Temır men taǧy ūzaq sıltestı. Jazyq jerde janarmaidy şelektep jūtar, adym aştyrmas kölıkterdı qasqyrlar ädeiı şoqyly, şūbar tas, şoqyraqqa sala beredı. «Leksus-570» osyndai bır orda qoş aitysyp, bögesınde qaldy. Sälden soŋ üş börı jyldamdyǧyn üdetıp, arlan tūsaulana keiındei berdı. Azuyn aiǧa bılegen Arlan-qasqyrdyŋ qyzyl közderınıŋ qaitary joq. Aitary da joq sekıldı. Aşu ǧana bar. Osy kezde aŋşy bıtken liukten basyn şyǧaryp, oq jaudyrdy. Arlan omaqasa asyp baryp, qaita tūrdy. Endı qaşqan joq. Qan aqqan alpauyt keudesın qyzyl jauyp ketıptı. Djipter qorşai toqtady. Ūzaq şabysty äinekten qyzyqtaǧan Arqaǧa ögei itter jerge tüsırıldı. Bes it batpai ūzaq tūrdy. - Aida! Pas! – dep audan äkımı basyn şyǧara aiǧailady, arlan äkım otyrǧan kölıktıŋ döŋgelegın qarş-qarş qauyp aldy. - Öi, qaitedı, - dep salonǧa jasyrynǧan äkımge janyndaǧy mas serıktesterı sausaq şoşaita küldı. Bırınşı alabai tap berıp edı, sälden soŋ qyŋsylyp şyqty, boi tartty. Aŋşy atauly , elırgen jūrt aspanǧa oq septı. Sol kezde nemıs ovcharkasy bastaǧan it bıtken...qaita ūmtyldy. İtter börını ūzaq talady. Ölı denege endı bärıbır bolatyn. Kök börısınıŋ aqşulan terısınen tük qalmapty. Ürkekqos, şoşyp qalǧan aŋşylar itterdı äreŋ ajyratyp aldy.
Jarty bastyq börınıŋ azuyna qarap tūryp, ūzaq araq ıştı... Esıne Keŋsaidaǧy Qonaev ziraty tüstı. Būryn qasyna barmaq tügılı köru qaida edı. Endı bır tömpeşık, janyna janasa jatsaŋ da eşkım qoi demeidı. Küzetşı, saqşy, kömekşı, hatşy qyz da joq. Qalasaŋ bırge tünep şyq. «Dimaş, Däkeŋ, nol bırınşı, şef, patron» degenderdıŋ, jıbermei jata jabysatynnyŋ bärı jym-jylas...
- Jaqsy dem aldyq, qaitalyq! «Jūmys...jūmys...jūmys». Jarty bastyqty täŋırısı börı emes, mysyqtıleu, buddasy - barys Astana tosyp tūrǧan. Djip ışınde jyly üilerge, qolaily jailarǧa bettep itter kettı. «Qarǧy baulary jarasyp». Suyq dalaǧa, aiazdy Arqaǧa qarap, bır jaq közı oiylyp alynǧan, ekınşı közı aşyq Arlan qala berdı. Endı ol-şyn azat!
"Adyrna" ūlttyq portaly
