Şäkärım universitetınıŋ oqytuşysy, mädeniet salasynyŋ üzdıgı, tanymal änşı Qairat Qabyşev Ginnestıŋ rekordtar kıtabyna üzılıssız 100 än oryndauǧa ötınış berdı. Osy erekşe maqsatqa orai 12 qaraşa künı Semeide joldama konsertı ūiymdastyryldy.
Būl şaranyŋ basty maqsaty – qazaq änınıŋ bai mūrasyn, onyŋ biıktıgı men sūlulyǧyn älemge tanytu jäne qazaq änşısınıŋ dauys quatynyŋ erekşe ekenın däleldeu. Kelesı kezeŋde Ginnes rekordtar kıtabynyŋ ökılderı arnaiy kelıp, Qairat Qabyşevtıŋ üzılıssız 100 än oryndau rekordyn kuälandyru üşın tyŋdauǧa qatysatyn bolady.
Konsert körermenderge erekşe äser qaldyrǧan siiaqty. Tamaşalauşylar Qairat Qabyşevtıŋ önerıne zor qoldau körsetıldı. Osy keş körermenı bolǧan belgılı ǧalym, professor Amantai İsin äleumettık jelıdegı paraqşasynda öz äserımen bölısken. «Bükıl ūjymǧa bügın tolassyz 100 än oryndauşynyŋ jeke konsertı būiyrdy. Būl – bolyp körmegen qūbylys, änşınıŋ de, tyŋdarmannyŋ da baqyty. Būryn armandauşy edık, şırkın, Mädeniet, Bolat, Sanaq, Keldenbai, Tūrsynǧazy, Nūriden, Amangeldı aita tüsse eken qatarymen köp ändı dep. Sahnaǧa bır-ekı, ärı ketkende üş änmen şyǧyp jürdı ǧoi ol düldülder. Myna ideia qatty ūnady. Qairat Qabyşev tolassyz 100 ändı käsıbi asqan şeberlıkpen jäne asqaq dauysymen aita alatynyna, elımızdegı bes än mektebınen taraǧan änderdı öz mänerınde, öz boiauynda jetkıze alatyndyǧyna közımız jettı!» - dep jazdy ol.
Osy oraida, änşı Qairat Qabyşevpen tıldesıp, konsertten alǧan äserın sūradyq.
QŪRMANBEK JANDARBEKOVTAN KEIINGI TALAP
- Än keşı qanşa uaqytqa sozyldy? Naqty neşe än şyrqaldy? Būl ideia qaidan tudy?
- Än keşı 2 saǧat 15 minutqa sozyldy. 25 ändei oryndaldy ǧoi deimın. Kezınde auyl-auyldy aralap jürdık qoi. Bügıngı än keşı sodan tuǧan oi boldy. Auyldy aralaǧanda mikrofonsyz-aq, saǧattap aitqan kezderım bolǧan. Keiınnen Kökşetauǧa da bardym. Sondaǧy tyŋdarmandarym sūraq qoiatyn edı. «Ana auylda än aityp, tüngı 4-ke deiın än aitqan kezderıŋız boldy. Sonda Qairekeŋ demalsyn deitın edı» dedı. Sonda bır jıgıt: «Aǧa, baiqap otyrmyn, sız ūzaǧynan än şyrqap otyrsyz. Qazaqta taŋdy-taŋǧa jalǧap, än aitqandar bolǧan. Sız nege solai aityp körmeisız?» degen. Oi sodan tuǧan ǧoi. Kezınde ülken ansamblde ärıptesterım de taŋǧalatyn. Grimerka, daiyndyq kabinetıme kırıp alyp, 3 saǧattap daiyndalatynmyn. Sol kezde özımnıŋ jaǧdaiymdy bıldım. Köptegen änşıler bar, bırneşe ännen soŋ tamaǧy auyryp qalatyndaryn kördım. Özımnıŋ studentterım bar, baiqaimyn. Odan keiın kezınde konservatoriiaǧa barǧan kezde studenttermen kezdesu bolyp, sonda söilep otyryp, 2,5 saǧat än aityppyn. Bır şäkırtım sūraq qoiyp edı. «Aǧa sız baǧanadan berı söilep otyrsyz, än salyp otyrsyz. Baiqaimyn, tamaǧyŋyz auyrǧan joq. Al bız 5-6 än aitsaq, tamaǧymyz auyryp qalady. Sonyŋ syryn aityŋyzşy», - degen bolatyn. Osyndai-osyndai äŋgımelerdıŋ bärı Ginnestıŋ rekordtar kıtabyna enu turaly ideiaǧa bastap äkeldı. Sodan oi tuyp, nege sony ıstemeske dedık. Kezınde Qūrmanbek Jandarbekov atamyzdyŋ osylai bır demde tolassyz 100 än şyrqaǧany turaly aitylady. Sonyŋ bärı osy baǧytta jūmys ısteuge bolatynyn körsetedı.
UNİVERSİTETTIŊ 90 JYLDYǦY JÄNE 100 ÄN
- Būl keş Ginneske jetuge joldama ma?
- Qazaqtyŋ özınıŋ qanynda bar ǧoi, talai änşı taŋdy atyryp än salǧan. Men jaŋalyq aşyp otyrǧan joqpyn. Sol atadan kele jatqan dästürdı jalǧastyryp jürmın. Aita alatynyma sendım. Universitet basşylyǧy menı şaqyryp alyp, «būl Ginneske şyǧu üşın dälel kerek. Soǧan orai Şäkärım universitetınıŋ 90 jyldyǧyna arnap, konsert berseŋız qalai bolady? Ary ketse 2 caǧat bolady ǧoi. Sol konserttı bız ūsynsaq, rekordqa qabyldai ma sosyn aitady», - dedı. Men kelıse kettım. Bügın konserttı berıp, halyq ta riza, men de än aityp, raqattanyp qaldym. Bıraq ary qarai da ändı aituǧa şamam jetetın edı. Oǧan halyq şarşaidy ǧoi. Sol sebeptı bügın ädemı keş jasadyq. Būl bır Şäkärım universitetımızdıŋ 90 jyldyǧyna toi şaşu siiaqty boldy. Özım de riza boldym. Qazır köp konsertte dästürlı änşını şyǧarmaidy ǧoi. Şyqqannyŋ özınde 1-2 än aitqyzady. Bolmasa bükıl änşını jinap alyp, bärıne bır-bır şumaqtan aitqyzyp qoiady. Ony «Än şeru» dep ataidy, men ony jek köremın. Baiaǧyda halyq aldyna şyqqan änşıge 10-15 än aitqyzyp, jıbermei qoiatyn bolǧan ǧoi. Qazır ondai joq, azaiyp kettı. Ginnestıŋ rekordtar kıtaby talabymyzdy qabyl alyp jatsa, bız ärine, daiynbyz.
- Köptıŋ aldynda än şyrqau öte qiyn ǧoi. Onyŋ üstıne toqtausyz än şyrqau qanşalyqty qiyn boldy?
- Köp aldynda än şyrqau qiyn. Ärine, bızdıŋ konsertımızdıŋ erekşelıgı boldy. Bügın halyq «ana ändı aityŋyzşy, myna ändı aityŋyzşy» dep sūrady. Sol kezde bıreuı joǧary ton, bıreuı tömen tondaǧy änderdı sūrap jatty. Ännen änge köşu oŋai emes. Ännıŋ de öz obrazy, mınezı bar. Körermen de, özım de än aitqan saiyn tamaǧym aşylatynyn baiqadym. Keibırı menı däl bügın 100 än aitady dep oilapty. Men 100 ändı Ginnes rekordtar talabyna kelse ǧana aitamyn. Ony şyrqau da oŋai emes. Sondyqtan būl konsertımız Ginnestıŋ rekordtar kıtabyna joldama retınde berıldı.
- Jiynǧa qanşa adam jinaldy?
- Zal özı 200 adamǧa arnalǧan. Zaldyŋ bärı aqyly ǧoi. Şäkärım universitetınıŋ zaly 200 oryndyq. Konsert barysynda syimai, türegep tūrǧandar da boldy.
«KONSERT BOLMAǦAN SOŊ ÖNERPAZ DA BOSAŊSİDY»
- Konsertten alǧan äserıŋız qandai? Köŋıl küiıŋız jaqsy ma?
- Al endı köŋıl küiım öte jaqsy. Moinymnan auyr jük tüstı. Būl da bır toiǧa şaşuym ǧoi. Būryn soŋdy änşılerımız jandy dauyspen aityp jürdı. Qazır köp aita almai jür. Ataqty änşınıŋ özı 7-8 ännen keiın baryp qyzady eken. Änşını köru üşın oǧan ändı köp aitqyzu kerek. Sonda ǧana änşınıŋ änşılıgın köre alasyŋ. Bızde myqty-myqty änşılerge tek 1-2 än aitqyzady. Sodan keiın, mysaly, maǧan bıreu sūraq qoidy. «Toida nege dästürlı än aitylmaidy?» dep. Toida dūrys mikrofon da bolmaidy. Köptegen dästürlı änşıler dombyrasyn qoiyp, estradaǧa ketıp qalyp jatady.
Ärine, mūndai keşter jiı ötıp tūratyn bolsa jaqsy. Konsertterde baiaǧy bır saryn, estrada şyrqalady. Sodan keiın bärı bır-bırıne eredı. Jeke dästürlı än keşı, jeke küişıler keşın ūiymdastyryp tūrsa olar da öz qalpyn ūstap otyrady ǧoi. Köptegen myqty küişıler bar. Solarǧa «nege küi tartpaisyŋ?» dep sūraimyn. «Aǧa, küi tartatyn konsert joq qoi» dep aitady. Konsert bolmaǧan soŋ önerpaz da bosaŋsyp, daiyndalmaidy eken. Sol sebeptı osyndai keşter köp bolsyn degen tılegım bar. Baiaǧyda «Adyrna» bırlestıgı Baluan Şolaqtyŋ än keşın ūiymdastyrǧanda halyq 3-4 saǧat ketpei qoidy. Sondai keşter köp bolsa deimız.
- Sūhbatyŋyzǧa rahmet! Talabyŋyzǧa jetıŋız!
Symbat Nauhan
«Adyrna» ūlttyq portaly
