Saryaǧaş: "Qyzyqqa toly studenttık ömır" atty festival öttı

Bügın «17 qaraşa - Halyqaralyq studentter» künıne orai, student jastardyŋ boiyndaǧy şyǧarmaşylyq qabıletterın jäne bılımge, önerge degen qūştarlyǧyn arttyru maqsatynda Saryaǧaş audandyq “Jastar resurstyq ortalyǧy” KMM-nıŋ ūiymdastyruymen “Qyzyqqa toly studenttık ömır” atty audandyq festivalı öttı. Merekelık şaraǧa audan äkımı Arman Abdullaev, Prezident janyndaǧy Ūlttyq qūryltai müşesı, «Daryn» jastar syilyǧynyŋ iegerı, aitysker aqyn Bırjan Baituov jäne oblystyq Jastar resurstyq ortalyǧy basşysynyŋ orynbasary Perdebek Esqūlov qatysyp, studentterdı arnaiy qūttyqtady. – Är adamnyŋ ömırınde erekşe oryn alatyn studenttık şaq eşqaşan ūmytylmaidy. Būl – qyzyǧy men qiyndyǧy qatar jüretın, bolaşaqqa bastar maŋyzdy kezeŋ. Sızder bügın jastyqtyŋ jarqyn sätterın bastan ötkerıp, erteŋgı eresek ömırge senımdı qadamdar jasap jatyrsyzdar. Aldaǧy uaqytta ülken jetıstıkterge jetıp, biıkterden körınulerıŋızge tılektespın, – dedı audan äkımı öz qūttyqtauynda. Festival baǧdarlamasy studentterdıŋ IT salasyndaǧy jetıstıkterı men qolöner būiymdarynyŋ körmesınen bastaldy. Keiın är kolledj özderınıŋ erekşe şyǧarmaşylyq qoiylymdary men önerlerın ūsyndy. Festival qorytyndysy boiynşa jeŋımpazdar anyqtaldy: • “Bılımdı ūrpaq” kezeŋı boiynşa – Qaplanbek joǧary agrarlyq tehnikalyq kolledjı I oryn; • “Menıŋ kolledjım” kezeŋı boiynşa – Abu Ali İbn Sina kolledjı I oryn; • “Ūmytylmas studenttık şaq” kezeŋı boiynşa – Arystanbab joǧary kolledjı I oryn; • Taqyryptyq körınıs boiynşa – Saryaǧaş medrese kolledjı I oryn. Barlyq jeŋımpazdar audan äkımınıŋ alǧys hattarymen jäne baǧaly syilyqtarmen marapattaldy. Aita ketsek, qazırgı uaqytta Saryaǧaş audanyndaǧy 6 arnauly orta oqu ornynda 5076 student bılım aluda, onyŋ 1283-ı jataqhanamen qamtamasyz etılgen. 2024 jyly 5 kolledjge 1075 memlekettık grant bölınıp, studentter tegın bılım alu mümkındıgıne ie boldy.