Qazaqstanda törtınşı mūnai öŋdeu zauyty salynady. Būl turaly Energetika ministrı Almasadam Sätqaliev Mäjılıste ötken Ükımet saǧatynda aitty, dep habarlaidy «Adyrna» tılşısı.
«2036 jyly kütıletın jeŋıl mūnai önımderınıŋ tapşylyǧyna bailanysty quaty jylyna 10 mln tonna bolatyn jaŋa mūnai öŋdeu zauytyn salu mäselesın qarastyryp jatyrmyz. 2030 jyldan keşıktırmei jobalaudy bastasaq, 2032 jyly qūrylysyna kırısu közdelgen»,—dedı ol.
Ministrdıŋ sözınşe, jaŋa MÖZ salu eldıŋ 2040-2050 jyldar aralyǧynda janar-jaǧarmai qajettılıgın qamtamasyz etıp, mūnai önımderın Ortalyq, Oŋtüstık jäne oŋtüstık-batys Aziianyŋ qarqyndy damyp kele jatqan naryqtaryna eksporttau mümkındıgın aşady.
Aita keteiık, qazırgı taŋda Pavlodar, Atyrauda jäne Oŋtüstık Qazaqstan oblysynda mūnai öŋdeu zauyty bar. Alaida būl zauyttar qazaqstandyqtardyŋ sūranysyn tolyq ötei almai keledı.
Törtınşı mūnai öŋdeu zauytyn salu mäselesı 2015 jyly köterılgen edı. Sol jyldary MÖZ 2021 jyldyŋ II toqsanynda ıske qosyluy mümkın degen aqparat tarady. Alaida joba jüzege aspady.
