Memleket basşysy Qasym-Jomart Toqaev turizm jäne sport ministrı Erbol Myrzabosynovty qabyldady. Būl turaly Aqorda jariialady, dep habarlaidy “Adyrna” ūlttyq portaly.
Prezident Qasym-Jomart Toqaevqa otandyq sport salasyn keşendı reformalau jönınde būǧan deiın berılgen tapsyrmalarynyŋ oryndalu barysy baiandaldy.
Memleket basşysyna balalar men jasöspırımder sportyn damytu, töreşıler men mamandar bılıktılıgın arttyru, legioner sanyn azaitu, federasiialar jūmysyn oŋtailandyru baǧytynda atqarylǧan jūmystar turaly esep berıldı.
Erbol Myrzabosynovtyŋ aituynşa, salaǧa vertikaldy basqaru jüiesın engızu şaralary bastaldy. Osy maqsatta ministrlık janynan arnaiy qūrylǧan top müşelerı öŋırlerdegı sport salasynyŋ jaǧdaiyna jan-jaqty taldau jürgızdı. Būdan bölek, qoldanystaǧy "Dene şynyqtyru jäne sport turaly" zaŋǧa negızgı basymdyqtardy aiqyndaityn özgerıster men tolyqtyrular engızu üşın jūmys toby qūryldy. Halyqaralyq federasiialarmen yntymaqtastyq aiasyn keŋeitu, sport infraqūrylymdaryn jetıldıru üşın jüielı jūmys jürgızılıp jatyr.
Sonymen qatar memleket basşysyna elımızdıŋ turistık äleuetın arttyru şaralary turaly mälımet berıldı. Mysaly, şeteldık saiahatşylarǧa türlı mümkındıkter ūsynatyn Neo Nomad Visa jobasy ıske qosyldy.
Prezident tapsyrmasyna säikes, Almaty tau klasterın, Maŋǧystau jäne Burabai kurorty aimaqtarynda jaǧajai turizmın damytu jönınde keşendı jospar äzırlenude. Oiyn biznesın jäne lotereiany retteu komitetı qūrylyp, ludomaniiaǧa qarsy küres qolǧa alyndy.
Kezdesu soŋynda Qasym-Jomart Toqaev ministrge sport jäne turizm salalaryn odan ärı jetıldıru jönınde bırqatar naqty mındet jüktedı. Atap aitqanda, aldaǧy uaqytta ötetın halyqaralyq sport dodalaryna daiyndyq deŋgeiın pysyqtaudy, sondai-aq elımızde tanymaldyǧy artyp kele jatqan padel sportyn ılgerıletuge nazar audarudy tapsyrdy.
