Qazaqstandyq Änel Sytdyqova TMD memleketterı arasynda alǧaş bolyp Antarktidany jüzıp öttı, dep habarlaidy "Adyrna" ūlttyq portaly.
Änel Sytdyqova 750 metr qaşyqtyqty 18 minut 58.95 sekundta eŋsergen. Būl uaqytta sudyŋ temperaturasy -1,4 gradus bolǧan.
«Antarktidanyŋ sularyn jüzıp öttık. Men üşın būl öte salqyn boldy. Sudyŋ salqyndyǧy -1,4 gradus bolsa, jeldıŋ jyldamdyǧy saǧatyna 35 şaqyrym edı. Aisbergter men pingvinder arasynda jüzudıŋ äserı bölek. Antarktida mūzdai qūşaǧyn aşqan az ǧana adamnyŋ qatarynda bolu men üşın erekşe oqiǧa boldy», - deidı Änel Sytdyqova.
Äneldıŋ aituynşa, Antarktidada ötkızılgen 10 kün ışınde olar jüzu üşın qolaily sättı kütken. Sonymen qatar, kemede taǧy 150 jolauşy bolǧandyqtan, olar kemenıŋ tärtıbın saqtau kerek bolǧan.
Änel Sytdyqova — Qazaqstannyŋ alǧaşqy «temır hanymy» triatlonnan, alǧaşqy aironmen jäne ultramen. Bes jyl būryn ol alǧaşqylardyŋ bırı bolyp La-Manş būǧazyn (38 kilometr) gidrokostiumsyz jüzu arqyly Qazaqstan atynan alǧaşqy jetıstıgın körsetken.
2022 jyly jazda Änel AQŞ-ta Manhetten aralynyŋ ainalasynda 20 köpırden ötıp, 48,5 kilometr qaşyqtyqty baǧyndyrdy. Būdan keiın ol Los-Andjeleste älemdegı eŋ ūzyn marafondyq qaşyqtyqtardyŋ bırı — Katalina būǧazyn (şamamen 34 kilometr) toqtausyz jüzdı.
Katalina, La-Manş jäne Manhetten ainalasyndaǧy 20 köpır — aşyq sudaǧy jüzuden älemdık «Üştık koronaǧa» (Triple Crown of Open Water) kıredı. Osylaişa, Änelge «Üştık korona hanşaiymy» ataǧy berılıp, ol «Üştık korona» klubynyŋ müşesı atandy. TMD keŋıstıgınde būndai jetıstıkke eşkım jetken joq.
Änel otbasymen bırge Angliiadaǧy Londonǧa jaqyn jerde tūrady.
Eske sala keteiık, 2019 jyldyŋ tamyzynda Prezident Qasym-Jomart Toqaev La-Manş būǧazyn alǧaşqylardyŋ bırı bolyp jüzgen qazaq qyzyna taŋdanysyn bıldırgen bolatyn.
Ūqsas jaŋalyqtar
