«Halyq kapıtalızmi»: «Aq jol» partııasy jekeshelendirilgen nysandardyń menshik úlesin eńbek ujymdaryna berýdi talap etýde – bul týraly Májilistiń plenarlyq otyrysynda QR Premer-Mınıstri Asqar Mamınge joldaǵan saýalynda Azat Perýashev aıtty.
Ol «Aq jol» partııasynyń árqashan naryqtyq reforma men memlekettik nysandardy jekeshelendirý arqyly ekonomıkadaǵy memlekettiń úlesin azaıtýǵa jaqtasyp kele jatqanyn atap ótti.
Alaıda, jergilikti jerlerdegi naryqtyq jekeshelendirýdiń (ıaǵnı ınvestorlardyń aqshasyna nysandardy satý) bir top adamnyń múddesine ketip jatqanyn kórinedi. Ásirese jańa qojaıyndardyń nysandardy keıingi tólem shartymen satyp alýy, sol arqyly memlekettik tólemdi memleket aqshasymen júrgizýi beleń alǵan.
««Aq jol» frakııasy osy saladaǵy jemqorlyqtyń aldyn alý úshin 2014 jyldan beri 5 depýtattyq saýal joldaǵan bolatyn. Endi osyndaı jaǵdaı qaıta oryn alyp otyr, másele Almaty qalasyndaǵy Balalar tis emhanasy jóninde.
Baspasózden belgili bolǵandaı nysan joǵaryda atalǵan ádispen, ıaǵnı bólip tóleý arqyly júzege asyrylǵan. Klınıkaǵa bıýdjetten jylyna 260 mln tg túsip tursa, jekeshelendirýge deıin klınıkanyń shotynda 170 mln tg bolǵan.
Al, tender jeńimpazynyń alǵashqy jáne kepildik somasy 92 mln tg. Iaǵnı bul soma obektiniń shotyndaǵy qarajattan eki ese az degen sóz! Budan keıingi de tólemder «ınvesstorsymaqtyń» emes, klınıkanyń bıýdjetinen tólenetini sózsiz ǵoı.
Qala jurtshylyǵynyń narazylyǵyna qaramastan, sot jekeshelendirý erejelerine sáıkes nysandy satty. Iaǵnı, basty másele osy erejelerdiń ózinde degen sóz, sebebi mundaı «jekeshelendirý» mysaldaryn «Aq jol» partııasy 2014, 2017, 2018 jyldary da keltirgen», - dedi partııa jetekshisi A.Perýashev.
Osyǵan baılanysty, «Aq jol» partııasy kelesi sheshimderdi usynǵan.
- Almatydaǵy balalar tis emhanasyn jekeshelendirý isin zań sheńberinde ǵana emes, memlekettik qyzmet etıka talaptaryna da tekserýdi;
- Eńbek ujymdarynyń múddesin qorǵaı otyryp, jekeshelendirý talaptaryna ózgeris engizý múmkindigin zertteýdi.
Atalmysh sheshimder, ıaǵnı «Halyq kapıtalızmi» myńdaǵan azamattarǵa eńbekaqy berip qana qoımaı, jumys oryndarynan dıvıdend alyp, ony basqarýǵa atsalysýǵa járdemdesip, jumysshy halyqtyń ál-aýqatyn jaqsartatyny sózsiz.
«Aq jol» partııasynyń baspasóz qyzmeti
