Mäjılıs töraǧasy Erlan Qoşanov bastaǧan Parlament delegasiiasy Mäskeude ötken Ūjymdyq qauıpsızdık turaly şart ūiymy Parlamenttık Assambleiasy Keŋesınıŋ kezektı otyrysy men on jetınşı plenarlyq otyrysyna qatysty.
Jiynda söz söilegen Erlan Qoşanov ärıptesterıne Qazaqstannyŋ ŪQŞŪ-ǧa töraǧalyq etuınıŋ qorytyndylary turaly aityp berdı.
– Ärıptesımızben bırlesken üilesımdı jūmystyŋ nätijesınde Qazaqstan Respublikasy Ūjymdyq qauıpsızdık turaly şart ūiymyna töraǧalyq etken kezeŋde ūiym aldynda tūrǧan barlyq mındet tolyq oryndaldy. Astanada ötken kezdesude elderımızdıŋ köşbasşylary Qazaqstannyŋ töraǧalyǧy barysynda atqarylǧan ıs-şaralarǧa joǧary baǧa berıp, ūiymdy odan ärı damytuǧa baǧyttalǧan maŋyzdy qūjattar qabyldady. Bız serıktesterımızge būl qūjattardyŋ tabysty jüzege asyryluyna qoldau körsetkenı üşın rizaşylyǧymyzdy bıldıremız. Ortaq müddelerımızdı eskere otyryp, ŪQŞŪ Parlamenttık ölşemın kezeŋ-kezeŋımen damytu men nyǧaitu baǧytyndaǧy jūmysymyzdy jalǧastyramyz, – dedı Mäjılıs spikerı.
Qazaqstannyŋ ŪQŞŪ-ǧa töraǧalyǧy kezınde ūiym müddelı eldermen jäne qauıpsızdık salasynda jūmys ısteitın halyqaralyq qūrylymdarmen yntymaqtastyqty nyǧaitty.
ŪQŞŪ men TMD, sondai-aq ŞYŪ arasyndaǧy bailanys jalǧasyn tapty.
Biyl qazan aiynda Mäskeude ŪQŞŪ – TMD – ŞYŪ formatyndaǧy dästürlı kezdesu öttı. Onda atalǧan ūiymdardyŋ negızgı saiasi prinsipterı men jarǧylyq erejelerınıŋ ūqsastyǧy atap ötıldı.
2024 jyly ŪQŞŪ-nyŋ BŪŪ-nyŋ baqylauşy märtebesın alǧanyna 20 jyl toldy. Sondai-aq osy jyldyŋ qaraşa aiynda Niu-Iorkte BŪŪ men ŪQŞŪ arasyndaǧy yntymaqtastyq turaly bırlesken qarar qabyldandy.
Mäjılıs spikerı öz sözınde ŪQŞŪ Parlamenttık Assambleiasy müşe memleketterge qauıpsızdık pen tūraqtylyq mäselelerı boiynşa syndarly dialog jürgızuge mümkındık beretının aitty.
Soŋǧy jyldary Assambleia ūjymdyq qauıpsızdıktıŋ maŋyzdy aspektılerın qamtityn bırqatar modeldık zaŋnamalyq aktı qabyldady. Atap aitqanda, aqparattyq jäne biologiialyq qauıpsızdık, terrorizm men ekstremizmge qarsy küres, esırtkı saudasyna tosqauyl qoiu salalaryndaǧy qūjattar.
Erlan Qoşanov Qazaqstan töraǧalyǧymen Ūly Jeŋıstıŋ 80 jyldyǧyn atap ötuge daiyndyqqa erekşe nazar audarylǧanyn aitty. Otyrystyŋ qorytyndysy boiynşa aldaǧy mereitoiǧa orai ŪQŞŪ Parlamenttık Assambleiasynyŋ Ündeuı qabyldandy.
ŪQŞŪ Parlamenttık Assambleiasy ıs-şaralary aiasynda delegasiia basşylary Resei Federasiiasynyŋ Prezidentı Vladimir Putinmen kezdestı. Erlan Qoşanov Resei Prezidentıne Qazaqstan Prezidentı Qasym-Jomart Toqaevtyŋ jyly lebızın jetkızıp, Qazaqstan men Resei arasyndaǧy parlamentaralyq qarym-qatynastyŋ joǧary qarqynyn atap öttı.
Kelesı jyly ŪQŞŪ-ǧa Qyrǧyz Respublikasy töraǧalyq etedı.
Otyrysta Qazaqstan tarapymen qatar, Resei Federasiiasy Memlekettık Dumasynyŋ töraǧasy Viacheslav Volodin, Belarus Respublikasy Ūlttyq jinalysy Ökılder palatasynyŋ töraǧasy İgor Sergeenko, Qyrǧyz Respublikasy Jogorku Keneşınıŋ töraǧasy Nūrlanbek Şakiev, Täjıkstannyŋ Madjlisi namoiandagon Madjlisi Oli töraǧasy Mahmadtoir Zokirzoda, sondai-aq ŪQŞŪ Bas hatşysynyŋ orynbasary Taalatbek Masadykov, ŪQŞŪ Parlamenttık Assambleiasynyŋ jauapty hatşysy Sergei Pospelov jäne Serbiia Respublikasy, Aljir Halyq Demokratiialyq Respublikasy men İran İslam Respublikasynyŋ ökılderı qatysty.
